जेन–जी युवाहरूको एक समूहले अबका दिनमा देश चलाउन र निर्वाचन गर्न गठन हुने अन्तरिम सरकारमा पूर्वप्रधानन्यायाधीश सुशीला कार्कीको नाम अघि सारेको छ।
उनीहरूले सामाजिक सञ्जाल 'डिस्कर्ड' मा करिब पाँच घन्टा छलफल गरेर कार्कीको नाममा सहमति गरेका हुन्।
जेन–जीका यस्तै समूह अरू पनि छन्। उनीहरू पनि छुट्टाछुट्टै रूपमा छलफलमा जुटेका छन्।
युट्युबमा पनि हेर्न सकिने लाइभ छलफल भने अहिले पनि जारी छ। छलफलमा करिब १० हजार जना सहभागी छन्। त्यही छलफलबाट सहमति भएको सुशीला कार्कीको नाम लिएर जेन–जी युवाहरूको एक टोली सेनासँग वार्तामा गइसकेको उनीहरूले बताएका छन्।
छलफलमा कुलमान घिसिङ, बालेन शाह लगायतको नाम पनि उठेको थियो।
अहिलेको संवेदनशील समयमा बन्ने सरकारको अभिभावक कानुन र विधिको रक्षा गर्नसक्ने इमानदार छवि भएको व्यक्ति हुनुपर्ने भएकाले गहन विमर्शपछि कार्कीको नाम प्रस्ताव गरिएको छलफलमा सहभागी एक युवाले बताए। यसबारे कार्कीसँग पनि कुराकानी भइसकेको उनको भनाइ छ।
राष्ट्रपति रामचन्द्र पौडेल र नेपाली सेनाका प्रधानसेनापति अशोकराज सिग्देलले मंगलबार साँझ वार्ताका लागि आह्वान गरेका थिए।
वार्ता आह्वानपछि जेन–जीहरूको छुट्टाछुट्टै समूह छलफल निम्ति जंगी अड्डा पुगेको पाइएको छ। जेन–जीहरूले लाइभ छलफलमा सहमति गर्नुअघि नै अर्को समूह जंगी अड्डामा छलफल गरेर बाहिरिएको कुरा पनि त्यहाँ उठेको थियो।
त्यसैमध्ये जंगी अड्डामा छलफल गर्न पुगेको समूहका प्रतिनिधि रक्षा बमले 'प्रधानसेनापति सिग्देलले दुर्गा प्रसाईं र राष्ट्रिय स्वतन्त्र पार्टीका प्रतिनिधिसँग छलफल गरेर आउनू भनेपछि आफूहरू बाहिरिएको' बताएकी छन्।
‘राष्ट्रपतिसँग भेट्न बोलाएर दुर्गा प्रसाईं र रास्वपा समूहसँग वार्तामा बस्नुस्, उहाँहरू पनि स्टेकहोल्डर हो भनेर स्वयं प्रधानसेनापतिले भनिसकेपछि जेन–जी आन्दोलन क्रममा भएको बलिदान र युगान्तकारी परिवर्तनको यात्रा तुहिने भएकाले हामी प्रस्ताव अस्वीकार गर्दै नेपाली सेनाको मुख्यालयबाट बाहिरिएर प्रदर्शनकारी जेन–जी समूहसँग छलफलका निम्ति तयारी गरिरहेका छौं,’ उनले भनिन्।
रक्षा बमको यो प्रतिक्रिया जेन–जीहरूको लाइभ छलफलमा पनि उठेको थियो। उनीहरूले दुर्गा प्रसाईं र रास्वपासँग वार्ता गर्ने कुरा अस्वीकार गरेका छन्।
छलफलमा सहभागी जेन–जी युवाहरूले लोकतन्त्र रक्षा गर्नुपर्नेमा जोड दिए। संवेदनशील समयको फाइदा उठाउँदै देशको नेतृत्व कुनै चरमपन्थी समूहको हातमा जानबाट रोक्नुपर्ने उनीहरूले बताए।
त्यस्तै उनकै समूहमा रहेका अरू युवा पनि मंगलबार साँझ वार्ताका लागि जंगी अड्डा पुगेका थिए। उनीहरूले जेन–जी प्रतिनिधिहरू देशभरि रहेको र संयुक्त दस्तावेज बनाइसकेपछि मात्र राष्ट्रपति पौडेल र प्रधानसेनापतिसँग वार्तामा बस्ने बताएकी थिइन्।
नेपाली सेनाले आन्दोलनमा सहभागी सबै पक्षसँग छलफल गर्न सहजीकरण गर्ने बताउँदै आएको छ।
'अहिलेसम्मको जानकारीअनुसार सम्बद्ध पक्ष सबैसँग बसेर परिस्थिति सहजीकरण गर्ने भन्ने हो,' सैनिक प्रवक्ता तथा सहायक रथि राजाराम बस्नेतले भने।
त्यस्तै, छलफलको निम्ति जंगी अड्डा पुगेका निमेश श्रेष्ठ र रेहानराज दंगालले सामाजिक सञ्जाल इन्स्टाग्राम मार्फत नेता को बन्ने भन्ने छलफल गर्न 'हामी नेपाली' का संस्थापक सुदन गुरूङलाई पठाएको बताएका थिए।
‘हामीले आधिकारिक रूपमा 'हामी नेपाल' भन्ने संस्थाका सुदन दाइलाई कुरा गर्न पठाएका छौं,' दंगालले भनेका छन्, 'हामीलाई एउटा राम्रो लिडर चाहिएको छ। त्यो लिडर कसलाई बनाउने भनेर छलफल हुँदैछ।'
लोकतन्त्र कायम होस् भन्ने चाहना जेन–जी युवाहरूको भएको उनले बताए।
.JPG1601549248.JPG)
-1746009348.jpg)
