काठमाडौँको नयाँबसपार्कस्थित ल्होत्से मलमा आगजनी हुँदा ३५ करोडभन्दा बढीको क्षति भएको छ।
जेनजी प्रदर्शनका क्रममा यही भदौ २४ गते राति ९ बजे ल्होत्से मलमा आगजनी भएको थियो। उक्त आगो भोलिपल्ट बिहान ५:३० बजे नियन्त्रणमा आएको थियो।
उक्त आगजनीबाट ३५ करोडभन्दा बढीको क्षति भएको ल्होत्से बहुउदेश्यीय प्रालिले जनाएको छ।
दसैं अगाडि उक्त घटना भएकाले चाडपर्व लक्षित गरी बिक्रीका लागि ल्याइएका कपडासहितका ५० भन्दाबढी कपडा पसल जलेर पूर्ण रुपमा नष्ट भएका प्रालिका अध्यक्ष एवं सञ्चालक दिपक कुँवरले जानकारी दिए।
उनका अनुसार कपडाबाहेक मोबाइल, रेष्टुरेन्टलगायत पसलसमेत जलेका छन् । यसअघि २०७९ फागुन १ गते यातायात मजदुरको आन्दोलनका क्रममा ल्होत्से मल तोडफोड हुनुका साथै आगजनीसमेत भएको थियो।
सोहीबेला उक्त मलभित्र रहेको मोबाइल पसल लुटपाट हुनुका साथै प्रहरीको भ्यानहरु जलाइएको थियो।
नयाँबसपार्क सञ्चालन गरेको ल्होत्से बहुउदेश्यीय प्रालिका अध्यक्ष कुँवरले व्यावसायिक संरचनामाथि विभिन्न समय आक्रमण तथा आगजनी हुँदा व्यवसायीको मनोबल घट्दै गएको बताए।
‘आगजनी र तोडफोडका घटनाले नेपालमा व्यवसाय गर्ने वातावरण हराउँदै गएको छ । व्यावसायिक भवनमा विभिन्न समयमा आक्रमण हुँदा चिन्ता थपिएको छ,’ उनले भने।
मलभित्रका पसल लुटपाट गर्ने तथा आगजानी गर्नेलाई सिसि क्यामेरा फुटेजका आधारमा कडा कारबाही गनुपर्नेमा उनले जोड दिए।
काठमाडौँ महानगरपालिकासँग सार्वजनिक निजी साझेदारीमा ल्होत्से बहुउदेश्यीय प्रालिले नयाँबसपार्कमा मल सञ्चालन गर्दै आएको छ।
विसं २०७४ मा ल्होत्से मल निर्माण गरी सञ्चालनमा ल्याइएको थियो।
-1746009348.jpg)
