कैलालीको बर्दगोदरिया गाउँपालिका–४ का ७४ वर्षीय हर्क साउदलाई तीन दिन अघि एकाएक हृदयघात भयो। घरपरिवारले तत्कालै उनलाई धनगढीस्थित माया मेट्रो हस्पिटलमा पुर्याउँछन्। तर त्यहाँ उनको उपचारका क्रममा मृत्यु भएको छ।
छोरा उदय साउद भारतमा भएकाले मृत्यु भएको तीन दिनसम्म पनि अन्त्यष्टि हुन सकेन। भारतको पुणेबाट अन्तिम संस्कार गर्न उदय आइतबार आइपुगे।
दिउँसो तीन वटा ट्याक्टर र एउटा शव बहानमा मलामी गएको थियो।
बर्दगोदरिया गाउँपालिका–४ स्थित मलामी बोकेर चिसापानीतर्फ जाँदै गरेको सु.प.०१००२ त ४९९१ नम्बरको ट्र्याक्टर लम्कीचुहा नगरपालिका–३ दुर्घटना हुँदा तीन जनाको मृत्यु भएको छ।
दुर्घटनामा परी बर्दगोदरिया गाउँपालिका–४ का ६४ वर्षीय दानबहादुर साउद, ३७ वर्षीय हर्कबहादुर साउद र १६ वर्षीय शितल साउदको घटनास्थलमै मृत्यु भएको जिल्ला प्रहरीका डिएसपी राजकुमार सिंहले जानकारी दिए।
१२ जना घाइते छन्। घाइतेमध्ये ६५ वर्षीय भीम रोकायालाई जिल्लास्थित लालरत्न हस्पिटल, लम्कीबाट थप उपचारका लागि बाँकेको नेपालगञ्ज रिफर गरिएको छ।
बढी चोट लागेकामध्ये ४५ वर्षीय सिंह साउदसहित अन्यको सोही हस्पिटलमा उपचार जारी छ।
वडाध्यक्ष जगतबहादुर शाहीका अनुसार मृतकमध्ये दानबहादुर साउद तीन दिनअघि बितेका हर्कका सम्धी हुन्। त्यस्तै, हर्कबहादुर भतिजा र शितल नाताले नाति हुन्।
वडाध्यक्ष शाहीका अनुसार तीन दिनअघि हृदयघातबाट मृत्यु भएका हर्कका एक जना नातिको ट्र्याक्टर दुर्घटनामा परी एउटा हात र अर्का नातिको एउटा खुट्टा भाँचिएको जानकारी चिकित्सकले दिएका छन्।
बुवाको मृत्युको खबरपछि तीन दिनमा घर आइपुगेका हर्कका एक्ला छोरा उदय भने शबहानमा बसेका कारण सकुशल छन्। हर्कको मलामी जाँदै गर्दा छोरीको घरका ससुरासहित तीन जना आफन्तको मृत्यु भए पनि हर्कको अन्त्येष्टि कार्य भने रोकिएन। आइतबार नै हर्कको अन्त्येष्टि गरिएको वडाध्यक्ष शाहीले बताए।
‘मलामी जाँदै गरेको एउटा ट्र्याक्टर दुर्घटनामा परी मानिसहरू च्यापिएको भए पनि अन्यले उहाँको शव घाटमा पुर्याएर अन्त्येष्टि गरिसकेका छन्,’ उनले भने, ‘म पनि अन्तिम संस्कार कार्यमा पुगेर छिटोछिटो घाइतेको उद्धार र उपचार कार्यमा सक्रिय भएँ।’
वडाध्यक्ष शाहीका अनुसार राजमार्गमा गुडिरहेको ट्र्याक्टर एकाएक पल्टिएको देखेर आफू चकित भएको बताए।
डिएसपी सिंहका अनुसार ट्र्याक्टर चालक फरार छन्। उनको खोजी भइरहेको छ।
वडाध्यक्ष शाहीले मलामी जाँदै गर्दा भएको ट्र्याक्टर दुर्घटनामा तीन जनाको मृत्यु भएपछि आफ्नो वडा शोकमा डुबेको बताए।
‘यहाँ धेरै मानिसलाई चोटपटक लागेको छ,’ उनले भने, ‘एकातिर मृत्युको शोक छ भने अर्कोतर्फ आफन्तको उपचारमा खटिनुपर्ने कठिन परिस्थिति सिर्जना भएको छ।’
1635339834.jpeg)
-1746009348.jpg)
