भदौ २४ गते लुटिएको प्रहरीको एउटा पेस्तोल एक लाख रूपैयाँसम्म बिक्री गरेको खुलेको छ।
प्रहरी वृत्त स्वयम्भूको टोलीले प्रहरीको एउटा पेस्तोल र १५ वटा गोली सहित पाँच जनालाई पक्राउ गरेको जिल्ला प्रहरी परिसर काठमाडौंका एसपी पवन भट्टराईले जानकारी दिए।
उनका अनुसार यसरी लुटिएको हतियार एकले अर्कोलाई क्रमश: बिक्री वितरण गरेको खुलेको हो।
भदौ २४ गते आन्दोलन भएपछि काठमाडौंका अधिकांश वृत्तमा आगजनी र तोडफोड भएका थिए। त्यसक्रममा प्रहरीका कयौं हतियार लुटिएका थिए।
त्यसरी लुटपाटमा धादिङका कृष्ण गुरूङ र काठमाडौंका राजन देउला पनि हुन्।
उनीहरू दुई जनाले त्यसदिन प्रहरीको पेस्तोल र १५ वटा गोली लुटेका थिए।
वृत्तको टोलीलाई गुरूङको घरमा पेस्तोल लुकाएर राखेको भन्ने सूचना आएको थियो। उक्त सूचनापछि कृष्णलाई प्रहरीले बौद्धबाट बिहीबार नियन्त्रणमा लिएको थियो। सुरूमा उनलाई नियन्त्रणमा लिएपछि राजनले पनि लुटपाटमा सघाएको खुल्यो।
तर उनीहरू दुबै जनासँग पेस्तोल थिएन।
सोधपुछका क्रममा उनीहरूले उक्त हतियार बेच्नका लागि अर्कै व्यक्तिलाई दिइसकेका थिए।
उनीहरूले भारतको विहार घर भई काठमाडौंको चमती बस्ने अकबर खानलाई दिएका थिए।
अकबरलाई नियन्त्रणमा लिएपछि उनीसँग पनि पेस्तोल फेला परेन।
उनले काठमाडौं-१५ बस्ने २६ वर्षीय सुमिन शाक्यलाई ६० हजार रुपैयाँमा बिक्री गरिएको बताए।
त्यसपछि प्रहरी सुनिमको खोजीमा लाग्यो। उनी पक्राउ परेपछि पेस्तोल फेरि अर्कै व्यक्तिलाई बिक्री गरिसकेको खुलेको हो।
सुनिमले बानेश्वर घर भएका ३८ वर्षीय प्रभात मल्ललाई एक लाख रुपैयाँ सम्ममा बिक्री गरेको खुलेको स्रोतले बतायो।
प्रभात कपडा पसले हुन्। उनको क्षेत्रपाटीमा पसल छ। प्रहरी मल्लको कपडा पसलमा पुगेर तलासी लिएको थियो।
पसलभित्र रहेको चेन्जिङ रूमभित्र कपडाले पेस्तोल र गोली बेरेर राखेको खुलेको हो।
पक्राउ पर्नेमाथि हातहतियार तथा खरखजाना सम्बन्धी कसुरमा प्रहरीले अनुसन्धान अघि बढाएको छ। काठमाडौं जिल्ला अदालतबाट ६ दिनको म्याद लिएर अनुसन्धान भइरहेको छ।
-1746009348.jpg)
