भारतको मथुरा-वृन्दावनस्थित एक प्रसिद्ध मन्दिरमा भक्तजनहरूले हात्तीको मूर्तिबाट झरिरहेको पानी पिउँदै गरेको भिडिओ केही दिनअघि सामाजिक सञ्जालमा भाइरल भयो।
उक्त भिडिओमा मथुरा-वृन्दावनको बाँके बिहारी मन्दिरमा भक्तजनहरू हातमा गिलास लिएर हात्तीको मूर्तिबाट झरिरहेको पानी पिउँदै गरेका देखिए।
भारतीय अखबार 'हिन्दुस्तान टाइम्स' का अनुसार त्यो पानी भगवान श्रीकृष्णको चरणबाट रसाएको 'चरणामृत' हो भन्ने भक्तजनहरूको विश्वास थियो।
मन्दिरको भित्तामा बनेको हात्तीको आकृतिबाट लगातार पानी बगिरहेको भिडिओमा देखिन्छ। भक्तजनहरू हातमा गिलास बोकेर लामबद्ध उभिएका छन्। र, आफ्नो पालो आएपछि गिलासमा पानी भर्दै पिइरहेका छन्। कसै-कसैले अञ्जुलीमा पानी भरेर पिएको पनि देखिन्छ।
तर यो घटनाको वास्तविकता अर्कै छ।
भारतीय अखबार 'दैनिक जागरण' मा प्रकाशित रिपोर्ट अनुसार भक्तजनले पवित्र ठानेर पिएको त्यो पानी वास्तवमा कोठामा जडान गरिएको एअर-कन्डिसनरबाट निस्किएको डिस्चार्ज पानी हो।
मन्दिरको संरचनामा हात्तीको सुँडको आकारमा पाइपहरू जोडिएका रहेछन्। त्यही पाइपबाट एसीको पानी रसाएर बाहिर निस्किँदो रहेछ।
भक्तजनलाई त्यो कुरा थाहा थिएन। त्यसैले उनीहरू त्यही पानीलाई चरणामृत मानेर ग्रहण गरिरहेका थिए।
हेर्नुहोस्, सामाजिक सञ्जालमा भाइरल भिडिओ —
-1746009348.jpg)
