श्रीमतीको हत्या आरोपमा रुपन्देही प्रहरीले एक जनालाई पक्राउ गरेको छ।
जिल्ला प्रहरी कार्यालय रुपन्देहीका अनुसार बागलुङ निसीखोला गाउँपालिका वडा नं. ६ का ३२ वर्षीय विजय भन्ने वीरबहादुर कुँवरलाई प्रहरीले उनकै श्रीमतीको हत्या आरोपमा पक्राउ गरेको हो।
प्रहरीका अनुसार वीरबहादुरकी श्रीमती २० वर्षीय मेलिना परियारले सिद्धार्थनगर नगरपालिका वडा नं. ८ स्थित लुम्बिनी गेटमा रहेको होटल लुम्बिनी गेटमा काम गर्दै आएकी थिइन्। गत कार्तिक २७ गते बिहान करिब ८ बजेतिर मेलिना सोही होटलको स्टाफ क्वाटरमा मृत भेटिएकी थिइन्।
होटलको स्टाफ क्वाटरमा मेलिना मृत फेला परेपछि अनुसन्धान गर्दै जाँदा हत्यामा उनकै श्रीमान वीरबहादुरको संलग्नता हुनसक्ने देखिएपछि पक्राउ गरिएको प्रहरीले जनाएको छ।
जिल्ला प्रहरी कार्यालय रुपन्देहीका सूचना अधिकारी सुरज कार्कीले मेलिनाको हत्याको अनुसन्धानको क्रममा उनकै श्रीमान वीरबहादुरलाई आइतबार पक्राउ गरिएको जानकारी दिए।
प्रहरीले गरेको प्रारम्भिक अनुसन्धान अनुसार मेलिना र वीर बहादुरबिच सामाजिक सञ्जाल प्रयोग गर्ने विषयमा विवाद हुँदै आएको थियो।
मेलिना अन्य पुरुषसँग कुरा गर्ने गरेको शंकाका आधारमा झैझगडा गर्ने गरेको प्रहरीको प्रारम्भिक बयानमा समेत वीरबहादुरले स्वीकार गरेको प्रहरीले जनाएको छ। घटनाको दिन पनि श्रीमान श्रीमतीबिच सोही विषयमा झैझगडा भएको र वीरबहादुरले मादक पदार्थ सेवन गरी मेलिनाको हत्या गरेको प्रहरीले अनुमान गरेको छ।
मेलिनाको हत्यापछि फरार रहेका वीरबहादुरलाई प्रहरीले खोजी गर्ने क्रममा बुटवल बसपार्क क्षेत्रमा लुकिछिपी बसेको अवस्थामा पक्राउ गरेको प्रहरी नायब उपरीक्षक कार्कीले बताए।
अहिले पक्राउ परेका कुँवरमाथि अनुसन्धानको प्रक्रिया अघि बढाएको प्रहरीले जनाएको छ।
-1763106181.jpg)
-1746009348.jpg)
