पाकिस्तानका सेना प्रमुख असीम मुनिरका पूर्वप्रतिद्वन्दी तथा जासुसी संस्था आईएसआईका प्रमुखलाई १४ वर्षको जेल सजाय दिइएको छ।
पाकिस्तानको एक सैन्य अदालतले जनरल फैज हमीदलाई १४ वर्षको जेल सजाय सुनाएको भनेर फाइनान्सियल टाइम्सले जनाएको छ।
हमीद एक समय मुनिरका प्रमुख प्रतिस्पर्धी थिए।
हाल जेलमा रहेका तत्कालीन प्रधानमन्त्री इमरान खानले २०१९ मा मुनिरलाई हटाएर हमीदलाई आईएसआईका प्रमुख बनाएका थिए।
आईएसआईका प्रमुखलाई पाकिस्तानमा सेना प्रमुखपछि सबैभन्दा शक्तिशाली सैनिक अधिकृत मानिन्छ।
खान प्रधानमन्त्री भएका बेला हमीदलाई भावी सेना प्रमुखका रूपमा लिइन्थ्यो।
तर सेनाको पहलमा खानको सरकार अप्रिल २०२२ मा अविश्वासको मतबाट ढलेको केही महिनापछि मुनिर सेना प्रमुख भएका थिए।
सेनाविरूद्ध खानले २०२३ मा गरेको देशव्यापी आन्दोलनमा साथ दिएको भनेर हमीदलाई पनि खानलाई जस्तै गिरफ्तार गरिएको थियो।
सेनाले हमीदमाथि राजनीतिक गतिविधिमा संलग्न भएको, शक्ति र सरकारी स्रोतको दुरुपयोग गरेको तथा सरकारी गोपनीयता ऐन उल्लंघन गरेको लगायत चार आरोपहरू लगाएको थियो। सोही मुद्दामा बिहीबार सैन्य अदालतले उनलाई १४ वर्षको जेल सजाय सुनाएको छ।
पाकिस्तानको संसदले गत महिना मात्रै संविधान संशोधन गरेर सेना प्रमुख फिल्ड मार्शल मुनिरलाई जीवनभर कानुनी उन्मुक्ति प्रदान गरेको छ।
संशोधन अनुसार मुनिर र अन्य पाँच-तारे जर्नेलहरूले जीवनभर कानुनी उन्मुक्ति पाउने छन्।
उनीहरू अवकाश पाए पनि ओहोदा भने रहिरहनेछ। मुनिरको अहिलेको कार्यकाल २०२७ मा सकिँदैछ। त्यसपछि पाँच वर्षका लागि कार्यकाल थपिन सक्नेछ।
संशोधनमाथि छलफलका क्रममा हाल जेलमा रहेका पूर्वप्रधानमन्त्री इमरान खानले नेतृत्व गरेको विपक्षी दल पाकिस्तान तेहरीक-ए-इन्साफका (पीटीआई) सांसदले संशोधनका प्रतिहरू च्यातेका थिए।
तर पनि तल्लो सदनले दुई तिहाई बहुमतका साथ संशोधन पारित गरेको छ।
सो संशोधनले मुनिरको सेनामाथिको नियन्त्रण थप विस्तार गरेको छ। नयाँ संशोधनले सेना प्रमुख मुनिरलाई रक्षा बल प्रमुखको उपाधि पनि प्रदान गरेको छ। यसले उनलाई वायुसेना र नौसेनाको पनि औपचारिक कमान्ड सुम्पेको छ।
मुनिरले थप शक्ति आर्जन गरेको एक महिनापछि उनका प्रतिस्पर्धी हमीदलाई १४ वर्ष जेल सजाय सुनाइएको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1763886130.jpeg)
-1746009348.jpg)
