आज कृष्णाष्टमी पर्व, भगवान श्रीकृष्णको पूजा–आराधना गरी मनाइँदै छ ।
यसै अवसरमा ललितपुरको पाटनसहित देशभरका कृष्ण मन्दिरहरुमा बिहानैदेखि दर्शनार्थीको घुईंचो लागेको छ । आज दिनभर धार्मिक प्रवचन, पूजापाठ तथा श्रीकृष्णको रथयात्रा गर्ने र झुला झुलाउने गरिन्छ ।
अन्याय, अत्याचार र आसुरी प्रवृत्तिबाट प्राणीहरुलाई संरक्षण प्रदान गर्न भगवान विष्णुले लिएका १० अवतारमध्ये आठौं अवतार मानिएका श्रीकृष्ण जन्मेको आजको रातलाई मोहरात्री पनि भनिन्छ । आजको दिनले दानवी प्रवृत्तिबाट समाजलाई संरक्षण प्रदान गर्न भगवान श्रीकृष्णले कंसरुपी राक्षस प्रवृत्तिको अन्त्य गरी समाजलाई शान्ति र सुव्यवस्था प्रदान गर्न मार्गदर्शन दिएको मानिन्छ ।
यस्तै महाभारतमा कौरवरुपी अन्यायी पक्षसँग जुधेर समाज उपयोगी काम गर्न तथा परोपकारमा लाग्न पनि यो दिनले प्रेरणा दिने विश्वास गरिन्छ । कृष्णाष्टमीको अवसरमा राष्ट्रपति विद्यादेवी भण्डारी पाटनस्थित कृष्ण मन्दिरमा पुग्ने कार्यक्रम छ ।
-1746009348.jpg)
