अविरल वर्षाका कारण जिल्लाको बाँफिकोट गाउँपालिका–९ झुला गाउँ पहिरोको जोखीममा परेको छ ।
गाउँमाथि र तलबाट दैनिकजसो पहिरो खस्न थालेपछि जोखिम बढ्दै गएकाले स्थानीयवासी पानी पर्न थालेपछि रातभर जाग्राम बस्ने गरेका छन्। पहिरोको मारमा साविकको झुला गाविसका ४ र ६ वडाका करीब ६० घरधुरीलाई समस्या भएको स्थानीयवासी प्रेम केसीले जानकारी दिए । पहिरोका कारण गाउँमा रहेको विद्यालयको धारा र खेलमैदान पुरिएको छ भने विद्यालय भवन पनि पहिरोको उच्च जोखीममा छ ।
गाउँमाथि र तल्लो भागबाट सडक खनेकाले अहिले पहिरो खस्न थालेको उनको भनाइ छ । पहिरो बढ्दै गएपछि गाउँ नै पुरिने डरले स्थानीयवासी रातभर जाग्राम बस्ने गरेका छन् ।
‘दिनदिनै पहिरो थपिएको थपियै छ,’ प्रेम केसीले भने, ‘वैकल्पिक व्यवस्था नहुँदा गाउँबाट अन्त जान पनि सकिएको छैन । पहिरो बढ्दै गएकाले दिनभर पनि त्रासमै घरमा बस्नुपर्ने अवस्था छ।’ पहिरो रोकथाम र वैकल्पिक व्यवस्थाका लागि सदरमुकामका विभिन्न निकायमा सहयोग माग गरेपनि बेवास्ता गरिएको स्थानीयबासीले जनाएका छन् ।रासस
-1746009348.jpg)
