महोत्तरी जिल्लामा बाढीमा ज्यान गुमाएका नौ जनामध्ये दुई जनालाई आइतबार २५ हजार रुपैयाँका दरले तत्काल राहत प्रदान गरिएको छ ।
सरकारले जिल्लामा बाढीमा ज्यान गुमाएकालाई दुई लाख रुपैयाँका दरले घोषणा गरेकामा हाल २५ हजार रुपैयाँ तत्काल राहतस्वरुप पठाएकामा दुई जनालाई जिल्ला प्रशासन कार्यालय महोत्तरीले सो रकम दिएको हो ।
प्रमुख जिल्ला अधिकारी बाबुराम श्रेष्ठले आइतबार बाढीमा ज्यान गुमाएका जलेश्वर नगरपालिका– २ का १५ वर्षीय बिक्कीकुमार ठाकुर र पिपरा गाउँपालिका– ६ का आठ वर्षीय रितेश सदाका अभिभावकलाई २५ हजार रुपैयाँका दरले राहत उपलब्ध गराए ।
यसबाहेक अन्य बाँकी मृतक सात जनाको परिवारलाई पनि आज तत्काल राहतस्वरुप २५/२५ हजार रुपैयाँ प्रदान गरिने जिल्ला प्रशासन कार्यालय महोत्तरीले जनाएको छ ।
साथै, बाँकी रहेका एक लाख ७५ हजार रुपैयाँ सरकारले पठाउनेबित्तिकै जिल्ला प्रशासनले पीडितलाई उपलब्ध गराउने प्रजिअ श्रेष्ठले बताए । यसैगरी, एलायन्स फोर डिजास्टर रिलिफले महोत्तरीका ३१५ जना बाढीपीडितलाई राहत वितरण गरेको छ ।
अविरल वर्षापछि आएको भीषण बाढीबाट प्रभावित भएका महोत्तरी जिल्लाको सदरमुकाम जलेश्वर नगरपालिका क्षेत्रका विभिन्न तीन वटा वडाका ३१५ जनालाई सो संस्थाले राहत वितरण गरेको हो ।
सो संस्थाले जलेश्वर नगरपालिका वडा नं २ का १५४ जना, वडा नं ८ का ५६ जना र वडा नं ३ का १०५ जना अति पीडितलाई राहत वितरण गरेको छ ।
बाढीबाट अन्नपात बगाएर खानलाई समस्या भइरहेका तीनवटै वडाका पीडितलाई सो संस्थाले चामल, दाल, नून, तेल, आलु, प्याज, जीवनजल र झुल वितरण गरेको छ । रासस
-1746009348.jpg)
