कञ्चनपुर शुक्लाफाँटा नगरपालिकाका जननिर्वाचित प्रतिनिधि र राष्ट्र सेवकका छोराछोरी अब सामुदायिक विद्यालयमा पढ्ने भएका छन् ।
सामुदायिक विद्यालयप्रतिको जनविश्वास जगाइ शिक्षाको गुणस्तर खस्कन नदिनका लागि यो अभियान सञ्चालन गरिएको हो । नगरपालिकाले नीति तथा कार्यक्रममै राष्ट्रसेवक कर्मचारी, शिक्षक, विद्यालय व्यवस्थापन समिति, जननिर्वाचित प्रतिनिधि र राजनीतिक दलका नेताका छोराछोरीलाई सामुदायिक विद्यालयमा पढ्ने व्यवस्था मिलाउन अभियान सञ्चालन गर्ने जनाएको छ ।
राज्यको ठूलो लगानी शिक्षामा गरिएको भए पनि प्रतिफल शून्य भएकाले सरकारी विद्यालयप्रतिको घट्दै गएको अभिरुचि जगाउनका लागि समाजका अगुवाका रूपमा रहेका समुदायका व्यक्तिका छोराछोरीलाई सामुदायिक विद्यालयमा पढाउने अभियान सञ्चालन गरिएको नगरपालिकाका प्रमुख दिलबहादुर ऐरले बताए ।
आफैँ सरकारी विद्यालयमा पढाउने शिक्षकले समेत छोराछोरीलाई निजी विद्यालयमा पढ्नका लागि पठाउने गरेको पाइएको छ उनले भने,‘यसलाई निरुत्साहित गरी सामुदायिक विद्यालयमासमेत निजी विद्यालयको भन्दा गुणस्तरीय पढाइ गर्नका लागि कार्य अगाडि बढाएका छौँं ।’
समाजका अगुवाका छोराछोरीले सरकारी विद्यालयमा पढ्न थालेपछि सरकारी विद्यालयको खस्कदैँ गएको छविमा सुधार भई सहज र सुलभ रूपमा पढ्ने वातावरण कायम हुने विश्वास उनले व्यक्त गरे ।
नगरपालिका क्षेत्रभित्र रहेका सामुदायिक विद्यालयको शैक्षिक गुणस्तर कायम गर्न र भौतिक पूर्वाधार विकासका लागि आवश्यकताका आधारमा बजेटको व्यवस्था गर्न प्रतिबद्ध भएको प्रमुख ऐरले बताए ।
‘विद्यालयका परिणामका आधारमा उपलब्ध गराउने गरी आठ करोड रुपैयाँ बजेटको व्यवस्था गरिएको छ’उनले भने । नगरपालिकाका कार्यकारी अधिकृत शेरबहादुर बुढाले यस अभियानलाई अगाडि बढाउनका लागि सबैको सहयोगको खाँचो रहेको बताए ।
‘सरकारी विद्यालयको अवस्थामा सुधार ल्याउनका लागि समाजका अगुवाहरूले छोराछोरीलाई सामुदायिक विद्यालयमा पढाउन थालेपछि दृष्टिकोणमा समेत परिवर्तन आउने छ’ अधिकृत बुढाले भने ।
शुक्लाफाँटा नगरपालिकामा आधारभूत तहको पढाइ हुने सामुदायिक विद्यालय १८ र माध्यमिक तहको पढाइ हुने विद्यालयको संख्या नौ रहेको छ । दुवै तहका विद्यालयमा गरी झण्डै आठ हजारभन्दा बढी बालबालिका अध्ययनरत छन्। नगरपालिकामा निजी विद्यालय २७ वटा छन् । रासस
-1746009348.jpg)
