बाजुराको गौमुल गाउँपालिकाले आर्थिक वर्ष २०७४/७५ का लागि २१ करोड ७४ लाख १९ हजार सातसय रुपैयाँको बजेट सार्वजनिक गरेको छ ।
गत आवको आयव्ययसमेत गाउँसभामा प्रस्तुत गरिएको थियो । गत आवको व्ययतर्फ तीन करोड २९ लाख ७२ हजार दुई सय रुपैयाँ र चालूतर्फ १८ करोड ३४ लाख ८९ हजार एकसय रुपैयाँ रकम विनियोजन गरेको गाउँपालिका प्रमुख हरिबहादुर रोकायाले बताएका छन् ।
गाउँपालिका सभाबाट भौतिक पूर्वाधारमा पाँच करोड दुई लाख रुपैयाँ, आर्थिक विकासमा एक करोड ८३ लाख रुपैयाँ, सामाजिक विकास क्षेत्र एक करोड २२ लाख ४० हजार रुपैयाँ, वातावरण, विपद् जोखिम न्यूनीकरणमा १४ लाख रुपैयाँ, संस्थागत विकास तथा सेवा प्रवाहमा १५ लाख रुपैयाँ, वित्तीय व्यवस्थापन तथा सुशासनमा नौ लाख रुपैयाँ र चालूतर्फ दुई करोड २९ लाख पाँच हजार रुपैयाँ क्षेत्रगत रूपमा विनियोजन गरिएको रोकायाले पत्रकार सम्मेलनमार्फत जानाकरी दिएका छन् ।
रोकायाले दिएको जानकारीअनुसार गाउँपालिकाको भवन निर्माणका लागि दुई करोड रुपैयाँ, चार वडा कार्यालयको भवन निर्माणका लागि ७० लाख रुपैयाँ, गाउँको आवधिक गुरुयोजना, सडक गुरुयोजनालगायतका गुरुयोजना निर्माणका लागि ४९ लाख रुपैयाँ, आफ्नै व्यवसाय आफैँ रोजगार कार्यक्रम अर्थात् युवा स्वरोजगार कार्यक्रमका लागि ९० लाख रुपैयाँ, खेलकुदमा छ लाख रुपैयाँ, सडक निर्माणमा एक करोड ४० लाख रुपैयाँ र विद्युत् आयोजनामा ३५ लाख रुपैयाँ विनियोजन गरिएको प्रमुख रोकायाले पत्रकार सम्मेलनमा बजेट प्रस्तुत गरेका थिए ।
मंगलबार आयोजित पत्रकार सम्मेलनमा रोकायाले गाउँसभाबाट पारित सात निर्णयसमेत सार्वजनिक गरे । सम्मेलनमा गौमुल गाउँपालिकाका उपाध्यक्ष सीता थापाले प्रस्तुत गरेको आर्थिक ऐन, विधेयक र आर्थिक विनियोजन विधेयकसमेत पारित गरिएको छ । गाउँसभामा आएका विभिन्न संघसंस्थाका कार्यक्रम समेत सभामा समावेश गरिएको थियो ।
आव २०७४/७५ का लागि नीति तथा कार्यक्रमसमेत समावेश गरिएको उपाध्यक्ष सीता थापाले बताईन् । उनले आर्थिक वर्षका लागि विषयगत रूपमा निर्णय गाउँसभाबाट पारित गरिएको बताईन् ।
गाउँपालिकाको शैक्षिक सुधारका लागि विद्यालय समायोजन महिनाको अन्तिममा अनिवार्य सिकाइ मापन गरिने, स्वास्थ्यमा पहुँच पुर्याउन १५ शैय्याको अस्पताल व्यवस्था गर्ने, प्रत्येक वडामा एकीकृत स्वास्थ्य शिविर सञ्चालन गर्ने, पाँच वर्षभित्र खानेपानी व्यवस्थित गरी प्रत्येक जनताको घरमा खानेपानीको पहुँच पुर्याउने, गाउँपालिकामा सांस्कृतिक संग्राहलय स्थापना गर्ने, कृषिलाई आधुनिकीकरण गर्दै लैजाने, पर्यटन प्रवर्द्धनका लागि योजना तयार गर्ने नीतिगत निर्णय भएको थापाको भनाइ रहेको छ ।
गाउँसभामा ‘एक घर एक रोजगारको नीति’ लिइने बताइएको छ । नागरिकता र मार्कसिट धितो राखी युवालाई ऋण उपलब्ध गराउने पनि निर्णय भएको छ । गाउँसभामा सहकारी सडक तथा पुलको गुरुयोजना बनाई पाँच वर्षमा प्रत्येक वडामा मोटर बाटो निर्माण गरिने भएको छ । सडक निर्माण भएका ठाउँमा प्रत्येक एक किलोमिटरमा झोलुंगे पुल निर्माण गरिने भएको छ ।
सभाले ऊर्जा, सिँचाइ, लघु तथा साना जलविद्युत् आयोजना, सञ्चार, वातावरण तथा विपद् व्यवस्थापन, संस्थागत विकास तथा सेवा प्रवाह र वित्तीय व्यवस्थापन र सुशासनका नीतिगत निर्णय भएको पत्रकार सम्मेलनमार्फत गाउँपालिका प्रमुख हरिबहादुर रोकायले जानकारी गराए । रासस
-1746009348.jpg)
