म्यानचेस्टर युनाइटेड एफए कप फुटबलको क्वाटरफाइनलमा प्रवेश गरेको छ । एफए कप अन्तर्गत शनिबार राति भएको पाँचौ चरणमा हडर्स्फिल्ड टाउनलाई २–० ले हराउँदै युनाइटेड अन्तिम ८ मा प्रवेश गरेको हो।
हडर्स्फिल्डको घरेलु मैदानमा भएको खेलमा युनाइटेडलाई जित दिलाउन दुवै गोल रोमेरो लुकाकुले गरे। लुकाकुले दुवै हाफमा समान एक एक गोल गर्दै युनाइटेडलाई क्वाटरफाइनलमा पुर्याए ।
पहिलो हाफको तेस्रो मिनेटमै गोल गर्दै लुकाकुले युनाइटेडलाई सुरुवाती अग्रता दिलाएका थिए । पहिलो हाफको अन्तिम मिनेटमा हुवान माटाले गोल गरेपनि भीएआर प्रविधिमा अफसाइड देखिएपछि गोलको मान्यता पाएन। दोस्रो हाफको ५५ औं मिनेटमा व्यक्तिगत दोस्रो गोल गर्दै लुकाकुले युनाइटेडलाई २ – ० को जित दिलाए।
शनिबार राति नै भएको खेलमा कोवेन्ट्रीलाई ३–१ ले हराएर ब्राइटनले पनि अन्तिम ८ मा स्थान पक्का गरेको छ । यस्तै राति नै भएको खेलमा वेष्ट ब्रोमलाई २–१ ले हराउँदै साउथह्याम्पटनले पनि अन्तिम ८ मा स्थान पक्का गरेको छ ।
तर शेफिल्ड वेइनस्डेसँग गोल रहित बराबरी खेलेको स्वान्सी सिटीले क्वाटरफाइनल प्रवेशका लागि आउँदो बुधबार रि–प्ले खेल्नु पर्ने भएको छ।
