एन्फा महिला लिगमा नेपाल पुलिस क्लब र रौतहटको चन्द्रपुर नगरपालिकाले बराबरी खेलेका छन्।
बुधबार एन्फा कम्प्लेक्स सातदोबाटोमा भएको खेलमा चन्द्रपुर र पुलिसबीचको खेल गोलरहित बराबरीमा सकिएको हो।
खेलको ७१ मिनेटमा चन्द्रपुरले खेलमा अग्रता लिने अवसर पाएको थियो।
पुलिसकी समिक्षा घिमिरेले डिबक्स भित्र ह्यान्ड गरेपछि चन्द्रपुरले पेनाल्टी पाएको थियो। तर प्राप्त पेनाल्टीमा चन्द्रपुर सफल हुन सकेन।
चन्द्रपुरकी दिलकुमारी मगरले प्रहार गरेको पेनाल्टीलाई पुलिसकी गोलकिपर उषा नाथले विफल पारेकी थिइन्।
जारी लिगमा पुलिस छ खेलबाट १२ अंक जोड्दै तेस्रो स्थानमा छ। उसले तीन खेलमा जित निकाल्दा तीन खेलमा बराबरी खेलेको छ।
चन्द्रपुर भने सात अंकसहित छैटौं स्थानमा छ। चन्द्रपुरले छ मध्ये एक खेलमा जित निकाल्दा चार खेल बराबरी खेलेको छ। चन्द्रपुर एक खेलमा मात्र पराजित भएको छ।
