खेलकुदका माध्यमबाट महिला सशक्तीकरण गर्ने उद्देश्यले फागुपूर्णिमाका अवसरमा बेनी नगरपालिका ४ सिङ्गा तातोपानीमा आमाहरूको फुटबल प्रतियोगिता भएको छ।
जलमाई भगवती आमा समूहले आयोजना गरेको प्रतियोगितामा तातोपानी, पखेर र सिङ्गाका पाँच वटा आमा समूह सहभागी भएकामा जलमाई भगवती आमा समूह (ए) ले मङ्गला गाउँपालिका–३ को पखेर आमा समूहलाई एकका विरुद्ध चार गोल गरेकोे छ।
यो समूहले खेल जितेर रु १५ हजार हात पारेको छ।
जलमाई भगवती आमा समूहका सचिव मीना जुग्जालीले आमाहरूको मात्र फुटबल प्रतियोगिता जिल्लामै पहिलो पटक तातोपानीमा भएको बताइन्।
‘खेलकुदमार्फत आमाहरूलाई जागरुक र सामाजिक क्षेत्रमा क्रियाशील बनाउन प्रतियोगिता आयोजना गरिएको हो,’ उनले भनिन्।
आमाहरू लुङ्गी, चोलो, कुर्तासुरुवालको पहिरनमा खेल मैदानमा उत्रिएका थिए। प्राकृतिक चिकित्सालयको रुपमा परिचित तातोपानीमा परम्परागत रूपमा लाग्ने फागुपूर्णिमा मेलालाई यसपटक आमा समूहले निरन्तरता दिएका हुन्।
मेलामा फाइभ ए साइड पुरुष फुटसल, महिला र पुरुष लठो तान्ने, अन्धनिशान, पुरुष तथा महिला छेलो प्रतियोगिता भएको थियो।
