किर्गिस्तानमा भएको सेन्ट्रल एसियन भलिबल (काभा) पुरुष भलिबल नेसन्स लिग प्रतियोगिताको नेपालले खराब प्रदर्शन गरेको छ।
नेपालले सबै खेलमा हार बेहोर्न बाध्य भएको हो। यसअघि लगातार पाँच खेलमा पराजित भएको नेपाल आइतबार अन्तिम खेलमा पनि पराजित भयो।
बिस्केकस्थित स्पोर्ट्स एन्ड रिक्रिएसन कम्प्लेक्समा आज भएको खेलमा आइतबार उज्वेकिस्तानले नेपाललाई ३–० को सोझो सेटमा पराजित गरेको हो।
उज्वेकिस्तानले नेपाललाई पहिलो सेट २५–२१ दोस्रो सेट २५–२२ र तेस्रो सेट २५–२३ ले पराजित गर्यो।
प्रतियोगितामा नेपालको यो लगातार छैटौँ हार हो।
यसअघि भएको पहिलो खेलमा नेपाल मङ्गोलियासँग पराजित भएको थियो भने दोस्रो खेलमा आयोजक किर्गिस्तानसँग पराजित भएको थियो।
त्यसैगरी, नेपाल तेस्रो खेलमा इरान, चौथो खेलमा तुर्किमिनिस्तान र पाँचौँ खेलमा आयोजक किर्गिस्तानको ‘बी’ टोलीसँग पराजित भएको थियो।
