अभिनेत्री बेनिशा हमाल निर्देशित छोटो फिल्म 'मिसिङ ब्राइड' सिनेमाघर एपमा सार्वजनिक भएको छ।
यो छोटो फिल्ममार्फत बेनिशाले निर्देशनमा डेब्यू गरेकी छन्।
बेनिशाले अभिनयको लामो अनुभवलाई ‘मिसिङ ब्राइड’ निर्माणमा प्रस्तुत गरेको बताइन्। ‘यो मेरो पहिलो प्रयास हो। पहिलो प्रयासमा आफू सफल भएकी छु भन्नेमा विश्वस्त छु’, उनले भनिन्।
थ्रिलर फिल्ममा अभिनेत्री वर्षा राउत र विवेक सिंह ठकुरीको मुख्य भूमिका छ। बेनिशाकै होम प्रोडक्सन मौरी पिक्चर्सको ब्यानरमा निर्मित फिल्मको कथा उनी स्वयंले तयार पारेकी हुन्।
शिवराम श्रेष्ठले छायांकन गरेको फिल्मलाई प्रविण श्रेष्ठले सम्पादन गरेका हुन्।
केदार भुषाल कार्यकारी निर्माता रहेको फिल्ममा सन्दीप घिमिरेको मुख्य सहायक निर्देशन, किशोर केसी र सदीक्षा गौतमको सहायक निर्देशन, आशिष पुडासैनीको प्रोडक्सन, नविन अवालको कला निर्देशन छ।
यो फिल्म सिनेमाघर एपबाट मोबाइल, ट्याब्लेट, आइप्याड र विभिन्न स्मार्ट टिभिमा विश्वभर बाट हेर्न सकिन्छ।
यतिबेला बेनिशा अभिनीत फिल्म ‘छक्का पन्जा ४’ प्रदर्शन भइरहेको छ। फागुन १९ गतेदेखि प्रदर्शन भइरहेको फिल्मले बक्स अफिसमा राम्रो कमाइ गरिरहेको छ।
