सडक थ्रिलर फिल्म 'बाटो: रोड टु डेथ' को ट्रेलर सार्वजनिक भएको छ।
शुक्रबार ओएसआर डिजिटल युट्युब च्यानलमार्फत फिल्मको ट्रेलर सार्वजनिक गरिएको हो। सार्वजनिक ट्रेलरमा साइकोटिक कल्ट ग्याङलाई खलनायकको रूपमा देखाइएको छ। फिल्मको कथा एक हत्या घटनाको वरपर घुम्छ।
काठमाडौं फिल्म्स प्रालिको ब्यानरमा निर्माण भएको फिल्मका लेखक तथा निर्देशक मदन थापा हुन्। चन्दन झाले निर्माण गरेको फिल्ममा मिथिला शर्मा, रक्षा थापा, सुलक्षण भारती, उत्पल झा, विजय ताम्राकारलगायत कलाकारको अभिनय छ।
नेपाली, अंग्रेजी, तमिल र हिन्दी भाषामा प्रदर्शन हुने फिल्मको प्रदर्शन मिति सार्वजनिक गरिएको छैन। फिल्मको दोस्रो ट्रेलर सार्वजनिक गर्दै प्रदर्शन मिति खुलाइने निर्माता चन्दन झाले बताए।
फिल्म डब्बी एटमस साउन्डमा तयार हुनेछ। डब्बी एटमस साउन्ड सिस्टममा नेपालमा पहिलो पटक फिल्म तयार हुन लागेको हो।
यो फिल्मलाई शरण ऋषिले छायांकन गरेका हुन्। निर्देशक थापा तथा छायांकार ऋषि भारतको चेन्नइ फिल्म उद्योगमा काम गर्दै आएका छन्।
