अभिनेत्री वर्षा सिवाकोटी अभिनीत फिल्म 'ए साथी सुन' को गीत सार्वजनिक भएको छ।
सोमबार साइराम पिक्चर्स युट्युब च्यानलमार्फत फिल्ममा समावेशी ‘मनले भन्छ’ बोलको गीत सार्वजनिक गरिएको हो।
लिरिकल भिडिओमा वर्षासँगै डेब्यू अभिनेता रमेश बानियाँको केही चल अचल दृश्यहरू समावेश गरिएको छ। उज्वल सागरको संगीत तथा स्वर रहेको गीतमा हर्क साउदको शब्द छ।
लभस्टोरी, थ्रिलर र कमेडी जनराको फिल्ममा वर्षा र रमेशसँगै आयन खड्का, सुशील पोखरेल, जयनन्द लामा, रमेश अधिकारी, कृष्मा खड्का, इभान सन्जेल, बिमला गिरीलगायत कलाकारको अभिनय छ। ‘ए साथी सुन’ जयनन्द लामा अभिनीत अन्तिम फिल्म हो।
रामराघव आचार्य लिखित तथा निर्देशित फिल्मलाई बीना कार्की र सन्तोषकुमार राईले मिलेर निर्माण गरेका हुन्। इभान इन्टरटेनमेन्टको प्रस्तुतिमा निर्माण भएको फिल्मको सह–निर्मातामा सुदीप पौडेल छन्।
यो फिल्म जेठ ५ गतेदेखि प्रदर्शन हुनेछ।
