किरण नेपालीको निर्देशनमा फिल्म 'सोली डोली' बन्ने भएको छ।
निर्माण टिमले आइतबार फिल्मको नाम सार्वजनिक गर्दै औपचारिक निर्माण घोषणा गरेका हुन्।
रेड बर्ड प्रोडक्शनको प्रस्तुतिमा बन्ने फिल्ममा ४ अभिनेता र ३ अभिनेत्री रहने बताइएको छ। तर फिल्मका कलाकारको नाम सार्वजनिक गरिएको छैन। कलाकारको नाम केही दिनमा नै सार्वजनिक गर्ने तयारी रहेको निर्देशक नेपालीले बताए।
‘पोई पर्यो काले र २ नम्बरी निर्माण गरिसकेपछि मैले निर्देशनमा हात हाल्न लागेको हुँ। दर्शकले पूर्ण रूपमा कमेडी कथामा फिल्म हेर्न पाउनुहुनेछ। फिल्मको छायांकन असोजबाट सुरू हुनेछ,’ उनले भने।
कमेडी जनरामा निर्माण हुन लागेको फिल्ममा अमलादेवी राई, प्रदीप भारद्धाज, हिमालय शर्मा र सुरज आचार्यको लगानी रहनेछ। सरोज नेपाली कार्यकारी निर्माता रहेको फिल्ममा प्रदीप भारद्धाजको कथा छ।
किरण फिल्म ‘हात्तीछाप’ निर्माणको समेत तयारीमा छन्। ‘हात्तीछाप’ को छायांकन सकेपछि ‘सोली डोली’ को छायांकन सुरू गर्ने किरणले बताए।
