बहुपति प्रथामा आधारित फिल्म 'टुल्की' को ट्रेलर सार्वजनिक भएको छ।
शुक्रबार टिपिजी युट्युब च्यानलमार्फत फिल्मको ट्रेलर सार्वजनिक गरिएको हो। सार्वजनिक ट्रेलरमा एउटा केटीलाई धेरै जना दाजुभाइले विवाह गर्दा आइ पर्ने समस्यालाई देखाइएको छ।
द पाल्म ग्रुप प्रालीद्वारा निर्माण गरिएको फिल्म डोल्पा जिल्लाको फोक्सुन्डो, त्रिपुराकोट, रल्ली, करेलीकाँडा लगायतका विकट गाउँबस्तीमा पुगेर छायांकन गरिएको हो।
आरपी कर्माचार्य र शेखर लामा निर्माता रहेको फिल्ममा शिशिर वाङ्देल, सोम लामा, स्वस्तिमा कार्की, सौजन सुब्बा, नरेन्द्र तामाङ, सोफिया लिम्बू, दीर्घ लामा, महेश लिम्बू, रत्नप्रसाद न्यौपाने, भक्तसिंह कठायतलगायत कलाकारको अभिनय रहेको छ।
फिल्म बहुपति प्रथामा मात्र सीमित नभई पश्चिम नेपालमा कुप्रथाको रूपमा व्याप्त छाउपडी प्रथालाई पनि उजागर गर्न खोजिएको निर्माण पक्षको भनाइ छ। फिल्मको छायांकन र निर्देशन देवजंग थापाले गरेका हुन्। तारा थापा किम्भेको सम्पादन रहेको चलचित्रमा मिक्सिङ दीप तुलाधरले गरेका छन्।
यो फिल्म जेठ १२ गतेदेखि प्रदर्शन हुँदैछ।
