सुरज पाण्डे निर्देशित फिल्म 'परस्त्री' को पहिलो गीत सार्वजनिक भएको छ।
बिहीबार म्युजिक नेपाल युट्युब च्यानलमार्फत 'माया बस्यो तिमीसँग' बोलको गीत सार्वजनिक गरिएको हो। केतन क्षेत्री र निखिता थापाको स्वर रहेको गीतमा अभिनेत्री शिल्पा मास्के र गौरव विष्टलाई देख्न सकिन्छ।
कोशिस क्षेत्री र केतन क्षेत्रीको शब्द तथा संगीत रहेको गीतमा उदयराज पौड्यालले संगीत संयोजन गरेका छन्।
विवाहेत्तर सम्बन्धले निम्त्याउने पारिवारिक र सामाजिक संकटको कथावस्तुमा निर्माण भएको फिल्म काठमाडौं र मुस्ताङमा छायांकन गरिएको हो। निरज कँडेलले छायांकन गरेको फिल्मलाई दीर्घ खड्काले सम्पादन गरेका हुन्।
फिल्ममा शिल्पा मास्के, कोशिस क्षेत्री, गौरव विष्ट, अलिसा क्षेत्री, आशान्त शर्मालगायत कलाकारको अभिनय छ।
डिएस डिजिटलको ब्यानरमा निर्माण भएको फिल्ममा शर्मिला पाण्डे र दिपेन्द्र के खनालले निर्माणमा सहकार्य गरेका छन्। खनाल फिल्मका लेखकसमेत हुन्।
यो फिल्म नेपालीसँगै हिन्दीमा असार १५ गतेदेखि प्रदर्शन हुनेछ।
