अभिनेता दयाहाङ राई नयाँ फिल्ममा अनुबन्धित भएका छन्।
पछिल्लो समय उनी एकपछि अर्काे फिल्म साइन गरिरहेका छन्। बुधबार उनले फिल्म 'कार्साङ' साइन गरेका हुन्। यस फिल्मलाई याम शेर्पाले निर्देशन गर्नेछन्। फिल्मको कथा पनि निर्देशक शेर्पाले नै तयार पारेका हुन्।
पुरुषोत्तम प्रधानले खिच्ने फिल्मको छायांकन बाह्रबिसे र बाँकी भोटेकोसीमा हुने निर्माण पक्षले बताएका छन्।
फिल्मका अन्य कलाकार तथा प्राविधिक छिट्टै फाइनल गरिने निर्देशक शेर्पाले बताए। 'फिल्मका बाँकी कलाकार अडिसनमार्फत छनोट गरिनेछ', शेर्पाले भने।
उनले फिल्म सामाजिक कथामा बन्ने बताए। उनको यो डेब्यू निर्देशकीय फिल्म हो। यसअघि उनले थुप्रै छोटो फिल्म निर्देशन गरिसकेका छन्।
यतिबेला हलमा दयाहाङ राई अभिनीत फिल्म 'जारी' प्रदर्शन भइरहेको छ। फिल्मले बक्स अफिसमा राम्रो कमाइ गर्नुको साथै दर्शकको तारिफ पनि बटुलिरहेको छ।
