शिल्पा मास्के अभिनीत फिल्म 'परस्त्री' को हिन्दी डब ट्रेलर सार्वजनिक गरिएको छ।
शनिबार बिफोरयु म्युजिक नामक युट्युब च्यानलमार्फत फिल्मको हिन्दी डब ट्रेलर सार्वजनिक गरिएको हो। सार्वजनिक ट्रेलरमा विवाहोत्तर सम्बन्धले निम्त्याउने समस्यालाई देखाइएको छ।
बिहीबार फिल्मको नेपाली ट्रेलर सार्वजनिक गरिएको थियो।
सुरज पाण्डे निर्देशित फिल्ममा शिल्पा मास्के, कोशिस क्षेत्री, गौरव विष्ट, अलिसा क्षेत्री, आशान्त शर्मा, रामबाबु रेग्मी, सरस्वती अधिकारीलगायत कलाकारको अभिनय छ। यो फिल्म काठमाडौं र मुस्ताङमा छायांकन गरिएको हो।
डिएस डिजिटलको ब्यानरमा निर्माण भएको फिल्म भारत प्रदर्शनमा नेन्दी क्रियसनसँग सहकार्य गरिएको छ। फिल्म निर्माणमा शर्मिला पाण्डे र दिपेन्द्र के खनालले सहकार्य गरेका छन्। खनाल फिल्मका लेखकसमेत हुन्।
निरज कँडेलले छायांकन गरेको फिल्मलाई दीर्घ खड्काले सम्पादन गरेका छन्।
यो फिल्म असार १५ गतेदेखि नेपाल र भारतमा एकसाथ प्रदर्शन हुनेछ।
