अभिनेता सरोज खनाल डेब्यू निर्देशित फिल्म 'बगान' को प्रदर्शन मिति तय भएको छ।
शुक्रबार निर्माण टिमले एक पोस्टर सार्वजनिक गर्दै फिल्मको प्रदर्शन मिति घोषणा गरेका हुन्। यो फिल्म असार २९ गतेदेखि प्रदर्शन हुनेछ।
सार्वजनिक पोस्टरमा फिल्मका मुख्य कलाकार सरोज खनाल, करिश्मा मानन्धर, आकाश श्रेष्ठ र नव-अभिनेत्री प्रमिला कार्कीलाई प्रस्तुत गरिएको छ।
फिल्ममा सरोज, करिश्मा, आकाश, प्रमिलासँगै नीर शाह, मिथिला शर्मा र बसुन्धरा भुसालको पनि मुख्य भूमिका छ।
नेपाली वेबसाइट डटकमको प्रस्तुती रहेको फिल्मका निर्माता सुरेश वाग्ले हुन् भने कार्यकारी निर्माता विनोद मानन्धर छन्।
उत्सव दाहाल र नारायण जिसीले छायांकन गरेको फिल्मलाई अर्जुन जिसी, राजेश शाह र सन्देश शाहले सम्पादन गरेका हुन्। फिल्ममा समिर मियाँको भिएफएक्स, रेनिश फागोको कलर करेक्सन, सुजिल कर्माचार्यको ब्याकराउन्ड स्कोर, मुकेश शाहको साउन्ड मिक्सिङ रहेको छ।
यो फिल्म नेपाल र अमेरिकासहित नेपालीको बसोबास रहने विभिन्न देशहरूमा फिल्म प्रदर्शन गर्ने योजना निर्माण टिमको छ। 'बगान' को वितरण रिच इन्टरटेन्मेन्ट र डिसिएनले काठमाडौं उपत्यका र बाहिर एफडी कम्पनीले गर्दैछ।
