सुरज पाण्डे डेब्यू निर्देशित फिल्म 'परस्त्री' को लिरिकल भिडिओ गीत सार्वजनिक भएको छ।
फिल्मकी मुख्य पात्र आध्याको जन्मदिनको सेटअपमा तयार पारिएको 'जीवन भनेको' बोलको गीत सार्वजनिक गरिएको हो। केतन क्षेत्रीको स्वर रहेको गीतमा कोशिस क्षेत्री, शिल्पा मास्के र गौरव विष्टका चल अचल दृश्यहरु समावेश गरिएको छ।
केके ब्रोदर्सको संगीत तथा शब्द रहेको गीतको संगीत संयोजन उदयराज पौडेलले गरेका हुन्। डिएस डिजिटलको ब्यानरमा निर्माण भएको फिल्म नेपाली र हिन्दीमा रिलिज हुनेछ।
विवाहोत्तर सम्बन्धले निम्त्याउने समस्यालाई देखाइएको फिल्ममा शिल्पा मास्के, कोशिस क्षेत्री, गौरव विष्ट, अलिसा क्षेत्री, आशान्त शर्मा, रामबाबु रेग्मी, सरस्वती अधिकारीलगायत कलाकारको अभिनय छ।
यो फिल्म काठमाडौं र मुस्ताङमा छायांकन गरिएको हो। फिल्ममा शर्मिला पाण्डे र दिपेन्द्र के खनालले निर्माणमा सहकार्य गरेका छन्। खनाल फिल्मका लेखकसमेत हुन्।
निरज कँडेलले छायांकन गरेको फिल्मलाई दीर्घ खड्काले सम्पादन गरेका छन्। यो फिल्म असार १५ गतेदेखि प्रदर्शन हुँदैछ।
