अभिनेता दयाहाङ राई र बेनिशा हमालको अभिनय रहने फिल्म 'हात्तीछाप' को छायांकन सुरू भएको छ।
आइतबार बालकुमारीमा रहेको एक ग्यारेजबाट फिल्मको छायांकन सुरू गरिएको हो। सिमोस सुनुवारले निर्देशन गर्ने लागेको फिल्ममा किरण नेपालीको लगानी रहनेछ।
सामाजिक कथावस्तुलाई कमेडी तरिकाले प्रस्तुत गरिने फिल्मलाई एक महिना खिचिने निर्माता नेपालीले जानकारी दिए। उनका अनुसार फिल्मको छायांकन १५ दिन काठमाडौं र १५ दिन पोखरामा हुनेछ। फिल्मलाई सुशान्त प्रजापतिले छायांकन गरिरहेका छन्।
फिल्ममा दयाहाङ राई, सौगात मल्ल, बेनिशा हमाल, उपासना सिंह ठकुरी, बुद्धि तामाङ, विजय बराल, विल्सन विक्रम राई, कमलमणी नेपाल, राजन खतिवडा, पुस्कर गुरुङ, प्रकाश घिमिरे, विनोद न्यौपाने, कविता आले, रविन्द्र झा, रियर राईलगायत कलाकारको अभिनय रहनेछ। फिल्मको कथा प्रदीप भारद्धाजले लेखेका हुन्।
अभिनेत्री बेनिशा हमालले पहिलो पटक दयाहाङ राईसँग काम गर्न पाउँदा आफू उत्साहित रहेको बताइन्।
यसअघि किरण नेपालीको निर्माणमै बनेको फिल्म '२ नम्बरी' मा दया, सौगात र उपासनाले काम गरेका थिए।
