कान्तिपुर फिल्म एकेडेमीले निर्माण गरेको सिरिज 'मिस स्कार्लेट' को टिजर सार्वजनिक भएको छ।
सोमबार कान्तिपुर फिल्म एकेडेमीको युट्युब च्यानलमार्फत सिरिजको टिजर सार्वजनिक गरिएको हो।
बलिराम चौहान लिखित तथा निर्देशित सिरिजमा गीत विष्ट, कुल श्रेष्ठ, कमल ओझा, आलिसा बास्तोला, कपिल रसाइली, सबी थापा, दिलिप नेपाल, सुमित्रा अधिकारीलगायत कलाकारको अभिनय छ। यसै सिरिजबाट गीत, कुल र कमलले डेब्यू गरेका हुन्।
प्रकाश पुरी क्रियटिभ प्रोड्युसर रहेको सिरिज विरगन्जमा छायांकन गरिएको हो। शेरबहादुर तामाङले छायांकन गरेको सिरिजलाई नवराज गैरेले सम्पादन गरेका हुन्।
साइकोलोजिकल थ्रिलर सिरिजको पहिलो सिजन ४ एपिसोडको हुनेछ। यसलाई नेपाली, हिन्दी र अंग्रेजी भाषामा तयार गरिएको छ।
नेपालको लागि तयार पारिएको यो सिरिज कान्तिपुर सिनेमाजबाट भदौ महिनामा रिलिज गरिनेछ। अन्तर्राष्ट्रिय ओटिटी प्लेटफर्ममा पनि हिन्दी र अंग्रेजी भाषामा रिलिज हुनेछ।
