भेनिस इन्टरनेसनल फिल्म फेस्टिभलमा शुक्रबार प्रिमियर हुन लागेको फिल्म 'द रेड सुटेकस' को फर्स्ट लुक सार्वजनिक भएको छ।
हलिउड चर्चित पत्रिका भेराइटीमार्फत फिल्मको फर्स्ट लुक सार्वजनिक गरिएको हो। निर्माण टिमले फर्स्ट लुकको रूपमा दुई मिनेट लामो भिडिओ क्लिप सार्वजनिक गरेका छन्। भिडिओमा देश फर्कने र देश छाड्नेको नियतिलाई प्रस्तुत गरिएको छ।
फिडेल देवकोटाको डेब्यू निर्देशित फिल्ममा सौगात मल्ल, विपीन कार्की, सृष्टि श्रेष्ठ र प्रविन खतिवडालगायत कलाकारको अभिनय छ।
फिडेल देवकोटाकै लेखन रहेको फिल्मले नेपालको अन्तर्राष्ट्रिय विमानस्थलबाट ट्रकमा सामान लिएर सुदूर गाउँमा जाने चालकको रहस्यमय कथा प्रस्तुत गर्छ।
'द रेड सुटेकस' भेनिसको होराजेन्टे विधामा प्रतिस्पर्धा गरिरहेको छ र शुक्रबार यसको वर्ल्ड प्रिमियर हुँदैछ। वर्ल्ड प्रिमियरमा फिल्मका कलाकार सौगात मल्ल, विपीन कार्की र सृष्टि श्रेष्ठ सहभागी हुँदैछन्।
फिल्मलाई आइसफल प्रोडक्सनका लागि रामकृष्ण पोखरेल र शोभा थापाले निर्माण गरेका हुन्। फिल्मको सहनिर्माणमा श्रीलंकाका निर्माता विमुक्ति जयसुन्दरा रहेका छन्।
