मोडल समिम खानले फिल्ममा डेब्यू गर्ने भएका छन्।
उनले दिवाकर भट्टराईको निर्देशनमा बन्ने फिल्म 'मायावी' बाट डेब्यू गर्न लागेका हुन्। समिम 'म्यान हन्ट इन्टरनेशनल नेपाल २०१६' का विजेता हुन्।
निर्देशक भट्टराईका अनुसार यतिबेला फिल्मको छायांकनमा जाने तयारी भइरहेको छ। छायाकंनअघि यस फिल्मका मुख्य कलाकारहरूको लाइनअप सार्वजनिक गरिएको छ।
फिल्मका लागि यसअघि नै दीपिका प्रसाईं, पल शाह र सुशील सिटौला अनुबन्धित भइसकेका छन्। दीपिका र दिवाकरले यसअघि फिल्म 'ऐश्वर्य' मा सहकार्य गरिसकेका छन्।
असोज २ गतेदेखि छायांकनमा जाने फिल्ममा निर्देशक भट्टराई स्वयंको कथा रहनेछ। क्रिएटिभ सिने आर्टसले निर्माण गर्न लागेको फिल्ममा एसडी योगीको संगीत, राम अविरल विष्टको गीत, राजुविक्रम थापाको डिओपी रहनेछ।
दिवाकरले फिल्म 'मेरो जीवन साथी, स्टुपिड मन, ड्रिम्स, ऐश्वर्य र क्याप्टेन' निर्देशन गरिसकेका छन्।
