अभिनेता राज कटुवाल निर्माता बन्ने भएका छन्।
उनले फिल्म 'मायावी' मार्फत निर्माणमा हात हालेका हुन्। फिल्मलाई दिवाकर भट्टराईले निर्देशन गर्नेछन्।
राजले फिल्म 'लीला' र 'लालटिन' मा अभिनय गरेका छन्। उनी चलचित्र विकास बोर्डका निवर्तमान सदस्यसमेत हुन्।
यतिबेला यस फिल्मको छायाकंन गर्ने तयारी भइरहेको छ। छायाकंनअघि यस फिल्मका मुख्य कलाकारहरूको लाइनअप सार्वजनिक भइरहेको छ। फिल्ममा निर्देशक भट्टराई स्वयंको कथा रहनेछ।
प्रेमकथामा बन्ने फिल्ममा दीपिका प्रसाईं, पल शाह, सुशिल सिटौला, समिम खान अनुबन्धित भइसकेका छन्। समिमले यसै फिल्मबाट डेब्यू गर्न लागेका हुन्।
क्रिएटिभ सिने आर्टसले निर्माण गर्न लागेको फिल्मका बाँकी कलाकार र प्राविधिकको सम्पूर्ण जानकारी दिर्दै निर्माण टिम असोज २ गतेबाट छायांकनमा जाने तयारीमा छ। फिल्ममा एसडी योगीको संगीत, राम अविरल विष्टको गीत, राजुविक्रम थापाको डिओपी रहनेछ।
फिल्मको छायांकन पोखराको रमणीय स्थलमा गरिने भएको छ। पोखराकै परिवेशमा रहेर यो फिल्मको कथा बुनिएको निर्माण टिमले जानकारी दिएको छ।
