ऋचा शर्मा र भोलाराज सापकोटा अभिनीत फिल्म 'कौसीद' को नयाँ गीत सार्वजनिक गरिएको छ।
बिहीबार ओएसआर डिजिटल युट्युब च्यानलमार्फत फिल्ममा समावेश 'सपनाको घर' बोलको गीत सार्वजनिक गरिएको हो। गीतमा दु:खबाट बाहिर निस्केर सुखी जिन्दगीको सपना बुनेको एक परिवारको कथालाई प्रस्तुत गरिएको छ।
आशिष रोक्काको स्वर, शब्द तथा संगीत रहेको लिरिकल गीतको भिडिओमा भोलाराज सापकोटा र ऋचा शर्मालाई देखाइएको छ।
कुमार भाष्करको निर्देशनमा बनेको फिल्ममा रूपेश दाहाल, परिक्षित विक्रम राणा, सदिक्षा गौतम, निर्भिक भट्टराई र सन्दीप लोहनीलगायत कलाकारको अभिनय छ।
केदार भुसालको निर्माणमा तयार भएको फिल्मको कार्यकारी निर्माता दिमेश श्रेष्ठ र सह-निर्माता लक्ष्मण बानियाँ हुन्। यो फिल्मको कथा लेखन नवविजय प्रकाश श्रेष्ठ र धिर्जन थपलियाले गरेका छन्। निसाल पौडेलले छायांकन गरेको फिल्मलाई भिम विश्वकर्माले सम्पादन गरेका हुन्।
बर्ड पिक्चर्सको ब्यानरमा तयार भएको फिल्मलाई आर आर फिल्म्सले वितरण गर्दैछ। यो फिल्म असोज २६ गतेदेखि प्रदर्शन हुँदैछ।
