मुकुन भुषाल र लक्ष्मी बर्देवा अभिनीत फिल्म 'विच्छेद' को टिजर सार्वजनिक भएको छ।
मंगलबार ओएसआर डिजिटल युट्युब च्यानलमार्फत फिल्मको टिजर सार्वजनिक गरिएको हो। टिजरमा दम्पतीको सम्बन्ध र बाध्यताका कुरा समावेश गरिएको छ।
सत्यराज चौलागाईंले निर्देशन गरेको फिल्ममा राज कुमार पण्डित, दिमेश श्रेष्ठ सुवास राई र सावित्री बज्राचार्यको लगानी छ। सह-निर्माता प्रविन राजथला हुन्। अभिनेता मुकुन भुषालले लेखेको कथामा निर्देशक चौलागाईंले पटकथा लेखेका छन्।
गाउँले परिवेशमा आधारित रहेको फिल्मको छायांकन रामेछापमा गरिएको हो। फिल्ममा मुकुन र लक्ष्मीसँगै सुष्मा निरौला, प्रिया रिजाल, लय संग्रौला, हिउँवाला गौतम, सरिता राजोपाध्याय, लक्ष्मीनाथ तिमिल्सिना, जीवन थापा, जयराम सापकोटालगायत कलाकारको अभिनय छ।
संकल्प भुजेलले छायांकन गरेको फिल्मलाई भुपेन्द्र अधिकारीले सम्पादन गरेका हुन्। फिल्मलाई काठमाडौं उपत्यकामा रिच इन्टरटेन्मेन्ट र उपत्यका बाहिर एफडी कम्पनीले वितरण गर्दैछन्।
यो फिल्म मंसिर ८ गतेदेखि प्रदर्शन हुनेछ।
