अभिनेता सुशिल श्रेष्ठको मुख्य भूमिका रहेको फिल्म 'आउट ल' को विदेश प्रदर्शन अधिकार विक्री भएको छ।
फिल्मको विदेश प्रदर्शन अधिकार सेभेन सिज इन्टरटेनमेन्ट प्रालीले किनेको हो। विदेश अधिकारसँगै सह-निर्माताको रूपमा पनि यो कम्पनी जोडिएको फिल्मका कार्यकारी निर्माता साहिल खानले बताए।
नेपाल वितरक रिच इन्टरटेनमेन्टका सञ्चालक करण श्रेष्ठले चाँडै फिल्मको फर्स्टलुक पोस्टर सार्वजनिक गर्दै प्रदर्शन मिति घोषणा गर्ने तयारी भइरहेको बताएका छन्।
फिल्ममा सुशिलसँगै नरेश पौडेल, शिक्षा संग्रौला, सुमन भण्डारी, हेम गुरुङ, विशाल पहारी, महेश त्रिपाठीलगायत कलाकारको अभिनय छ। फिल्मलाई नवीन गुरुङले छायांकन गरेका हुन्।
एक्सन थ्रिलर जनरामा निर्माण हुने फिल्मले कानुन नमान्ने पात्रको कथा भन्छ। शशांक खड्का, अमित अग्रहरी र बिनोद कठायतको लगानीमा निर्माण भएको फिल्मलाई बिक्की महर्जनले निर्देशन गरेका हुन्।
