अभिनेता हरिवंश आचार्य र प्रकाश सपुतको मुख्य भूमिका रहनेगरी फिल्म 'हरिबहादुरको जुत्ता' निर्माण हुने भएको छ। फिल्मलाई दिपेन्द्र के. खनालले निर्देशन गर्नेछन्।
गायक तथा म्युजिक भिडिओ निर्माता सरोज ओलीले फिल्म निर्माण गर्न लागेका हुन्। ओलीले बुधबार चलचित्र विकास बोर्डमा यो नाममा फिल्म दर्ता गराउँदै निर्माण इजाजतसमेत लिएका छन्।
फिल्मको पटकथा तथा संवाद हरिवंशले लेखेका छन्।
'मेरो मनमा एउटा कन्सेप्ट फुरिरहेको थियो,' अभिनेता तथा लेखक हरिवंशले भने, 'सरोज ओली भाइलाई सुनाएपछि यसमा म आफै फिल्म बनाउँछु भनेर उहाँ हौसिनुभयो। त्यसपछि फिल्मको लिड रोलमा पनि मलाई नै अनुबन्धित गर्नुभयो। आइडिया युनिक छ, फिल्म राम्रो बन्छ भन्नेमा म विश्वस्त छु।'
अभिनेता आचार्य र निर्माता ओलीबीच म्युजिक भिडिओमा लगातार सहकार्य हुँदै आइरहेको छ। फिल्म निर्माणमा भने ओली पहिलोपटक होमिएका हुन्।
हरिवंशले आफूले खोजेजस्तै कन्सेप्ट सुनाएपछि फिल्म निर्माण गर्न कस्सिएको निर्माता ओलीले बताए।
'करिब २५ वर्षदेखि कला क्षेत्रमा लागिरहेको थिएँ। तर फिल्म निर्माणको साइत जुरेको थिएन,' ओलीले भने, 'राम्रो कथा पाएँ भने फिल्म निर्माण गर्छु भन्ने तयारीमै थिएँ। यत्तिकैमा हरिवंश दाईले हरिबहादुर जुत्ताको कन्सेप्ट सुनाउनुभयो। सुन्नेवित्तिकै मनप¥यो।'
अभिनेताद्धय हरिवंश र प्रकाशसँग निर्देशक दिपेन्द्रको यो पहिलो सहकार्य हो। प्रकाशका अनुसार यो फिल्म तीन पुस्ताका कलाकर्मीलाई जोड्ने कडी बन्नेछ।
'म सानैदेखि हरिवंश दाईलाई टेलिभिजनमा देखेर हुर्किएको हुँ,' प्रकाश भन्छन्, 'संगीतमा लाग्छु भन्ने त थियो तर फिल्ममा यसरी काम गर्न पाउँला, सोचेको थिइनँ। आज उहाँसँग जोडिन पाउँदा औधि खुसी छु। निर्देशनमा दिपेन्द्र दाईको बेग्लै उचाइ छ। यो फिल्म तीन फरक पुस्ताका कलाकर्मीलाई जोडेको छ। पक्कै केही नयाँ र विशेष हुनेछ भन्नेमा म आशावादी छु।'
फिल्मको थप 'कास्ट एन्ड क्रु' फाइनल हुन बाँकी छ। कथासारबारे पनि निर्माण पक्षले केही खुलाएको छैन।
हरिवंशको पछिल्लो फिल्म 'महाजात्रा' गत वर्ष रिलिज भएको थियो। त्यस्तै 'परदेशी २' बाट फिल्ममा डेब्यु गरेका उनको अर्को फिल्म 'पूर्णबहादुरको सारंगी' तिहारमा रिलिज हुँदैछ। प्रकाश आफ्नै लेखन एवं निर्देशनमा फिल्म 'बसन्त' निर्माण गर्दैछन्।
