प्रकाश सपुतको फिल्म 'वसन्त' को फस्टलुक पोस्टर सार्वजनिक गरिएको छ।
शुक्रबार हरितालिका तीजको अवसर पारेर ल्याइएको पोस्टरमा फिल्मका प्रमुख पाँच कलाकारहरूलाई प्रस्तुत गरिएको छ। प्रकाश सपुत, स्वस्तिमा खड्का, प्रभात पाल ठकुरी, खड्ग बहादुर पुन (खबपु) र शिभान्सी श्री पोस्टरमा छन्।
क्यारेक्टरमा प्रस्तुत कलाकारहरू विद्यार्थीको पोशाकमा कापी–किताब च्याप्दै विद्यालयतिर दौडिएको देख्न सकिन्छ।
प्रकाशको पात्रको नाम वसन्त विक राखिएको छ। त्यस्तै, स्वस्तिमाको पात्रको नाम शान्ति शर्मा, प्रभात पालको प्रेम आर क्षेत्री, खबपुको सत्य बहादुर मगर र शिभान्सी सपना विक राखिएको छ। शिभान्सीले 'वसन्त' बाट फिल्ममा डेब्यु गर्न लागेकी हुन्।
गलबन्दी प्रोडक्सनको प्रस्तुति रहेको रहेको फिल्ममा प्रकाशको कथा, संगीत र निर्देशन रहनेछ। कार्यकारी निर्मातामा मोहन विश्वकर्मा, अनुरोध भट्टराई र नाना थकाली छन्।
फिल्मको भोलि शुभमुहूर्त गरिँदैछ। बागलुङको कालिका भगवती मन्दिर परिषरमा शान्ति पदयात्रा सहित मुहूर्त गर्न लागिएको गलबन्दी प्रोडक्सनका कार्यकारी प्रमुख दिल शिरीषले बताए। त्यसपश्चात धम्जादेखि फिल्मको छायांकन सुरू हुनेछ।
यो फिल्ममा अनुप बराल, प्रकाश घिमिरे र कमलमणि नेपालको समेत अभिनय रहनेछ।
