अभिनेत्री नन्दिता केसी आमा बन्दैछिन्।
उनले सामाजिक सञ्जालमा श्रीमानसँगको तस्वीर सेयर गर्दै आफू आमा बन्न लागेको जानकारी दिएकी छन्।
उनले लेखेकी छन् 'नारीले पाएको मातृत्वको वरदान र पुरुषले पाएको जगत पिताको वरदान। सन्तानलाई गर्भमा हुर्काउँदै गर्दा आफूलाई भाग्यमानी महसुस गरिरहेका छौं। भगवानको आशीर्वाद र मातापिताको साथमा आफन्तजन र सम्पूर्ण शुभचिन्तकको आशीर्वादलाई शिरोपण गर्दैछौं।'
नन्दिताको यो पोस्टमा शुभचिन्तक, फ्यान एवं कलाकारहरूले बधाई र शुभकामना दिइरहेका छन्।
फोटोमा नन्दिताले लगाएको टिसर्टमा 'सुन टु वि ममी' लेखिएको छ। उनका श्रीमान अरविन्द्र कटवालले लगाएको टिसर्टमा 'सुन टु वि ड्याडी' लेखिएको छ।
नन्दिताले अर्कोसासु र ससुरासँगको फेमिली तस्बिर पनि पोस्ट गरेकी छन्। पछिल्लो समय अमेरिकामा बस्दै आएकी नन्दिताले गत वर्ष विवाह गरेकी थिइन्।
उनले 'इन्द्रेणी, भरोसा, युद्ध, हामी तीन भाइ, सपना, निशाना, बाटो मूनिको फूल' लगायतका तीन दर्जन हाराहारी फिल्ममा अभिनय गरेकी छन्।
