धिरज मगर र उपासना सिंह ठकुरीको शीर्ष भूमिका रहेको फिल्म 'खुस्मा' आजबाट प्रदर्शनमा आएको छ।
संविधान दिवसको अवसर पारेर यो साता फिल्म बिहीबार रिलिज भएको हो।
मगर समुदायको परिवेशमा निर्माण भएको प्रेमकथामा आधारित फिल्मलाई अशोक थापा मगरले लेखन तथा निर्देशन गरेका हुन्। फिल्मले जनयुद्धको प्रभावकाबीच अंकुराएको प्रेमलाई पर्दामा देखाएको छ।
फिल्ममा धिरज र उपासनासहित माओत्से गुरूङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरूण मगर, सारा राई, श्वेता मिश्र, विवेश मगर लगायत कलाकारहरूले अभिनय गरेका छन्।
एम मिडिया प्रालिको ब्यानरमा निर्माण भएको फिल्मको निर्मातामा वीर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर छन्, भने सह–निर्माता सुस्मिता बुढाथोकी हुन्।
प्रिमियरमा प्रशंसा पाएको फिल्मले हलमा दर्शकको साथ पाउने विश्वास निर्माण पक्षको छ। फिल्मको गीत ‘रूकुम मैकोट’ पनि पछिल्लो समय चर्चामा छ।
