स्वस्तिमा खड्का र निश्चल बस्नेतको निर्माण एवं शीर्ष अभिनय रहेको फिल्म 'बेहुली फ्रम मेघौली' को ट्रेलर सार्वजनिक गरिएको छ।
बिहीबार काठमाडौंमा आयोजित कार्यक्रमकाबीच रिलिज ट्रेलरमा छोरीको विवाहका लागि योग्य वर खोज्न परिवारले गरेको संघर्षको कथालाई देखाइएको छ। यसमा स्वस्तिमा विवाहका लागि दबाब झेलिरहेकी ३० वर्षीया युवतीको भूमिकामा छिन्।
३ मिनेट १७ सेकेन्डको ट्रेलर रमाइलो र हास्यरसले भरिपूर्ण छ। फिल्मका अधिकांश कलाकारहरूलाई ट्रेलरमा देखाइएको छ।
स्वस्तिमा र निश्चलसहित फिल्ममा बसुन्धरा भुषाल, बिजय बराल, सिम्रन खड्का, रक्षा थापा, लोकेन्द्र लेखक, सिरु बिष्ट, आमिर गौतम लगायत कलाकारहरूको अभिनय छ।
ब्ल्याक हर्स पिक्चर्स र मेघौली फिल्मस्को ब्यानरमा बनेको फिल्मलाई सजन काफ्ले र आकाश बरालले लेखन तथा निर्देशन गरेका हुन्।
फिल्म असोज १७ अर्थात् दसैंको घटस्थापनाबाट प्रदर्शनमा आउनेछ।
