कार्तिक १५ (लक्ष्मी पूजा) मा रिलिज हुन लागेको फिल्म 'एक्टरः टेक वान' का एकसाथ तीन नयाँ पोस्टरहरू सार्वजनिक गरिएको छ।
पोस्टरमा फिल्मका प्रमुख कलाकारहरू प्रदिप खड्का, आना शर्मा र दिव्या रायमाझीलाई प्रस्तुत गरिएको छ। रोयल भिमसेन र ट्राइडेन्ट कन्सेप्ट टिमले पोस्टरहरू डिजाइन गरेका हुन्।
एक पोस्टरमा प्रदिप खड्कालाई आना र दिव्याको बीचमा राखिएको छ भने अन्य दुई पोस्टरमा अभिनेत्रीहरू आना र दिव्यालाई प्रदिपसँग प्रेमभावमा प्रस्तुत गरिएको छ। यी पोस्टरहरूबाट फिल्म त्रिकोणात्मक प्रेमकथामा बनेको संकेत पाइन्छ।
निर्माता थम्मन कुमार भण्डारीका अनुसार यी पोस्टरहरू आगामी प्रचार–प्रसारका लागि प्रयोग गरिनेछन्।
राजन भुसालको निर्देशन रहेको यो फिल्ममा प्रदिप, आना र दिव्यासहित राजबल्लभ कोइराला, दिव्य देव, उषा रजक र सुशील सिटौला लगायत कलाकारहरूको अभिनय छ।
अदृत फिल्मस् र मोती फिल्मस्को संयुक्त प्रस्तुतिमा बनेको फिल्मका निर्माता थम्मन कुमार भण्डारी हुन्। अनिश भुसाल सह–निर्माता र क्रियटिभ प्रोड्युसर मोती कार्की हुन्।
फिल्मको स्क्रिप्ट आकाश बराल र राजन भुसालले संयुक्त रूपमा लेखेका हुन्।
