अभिनेता विजय बरालको व्यस्तता र चर्चा दुवै बढ्दो छ।
उनले फिल्मदेखि कमेडी टिभी शोबाट समेत दर्शकको मन जितिरहेका छन्। 'पूर्णबहादुरको सारंगी' सुपरहिट भएपछि उनको चर्चा र व्यस्तता झनै चुलिएको छ।
विजय कमेडी टेलिभिजन शो 'कमेडी दरबार' मा देखिँदै आएका छन्। विजयको आगामी फिल्म 'लाज शरणम्' फागुन १४ गतेदेखि प्रदर्शनमा आउने तयारी छ।
उनी हालसालै 'जनै हराएको बाहुन' मा पनि अनुबन्धित भएका छन्। अन्य फिल्मका लागि पनि उनीकहाँ अफर पुगिरहेको छ।
यस्तोमा अब लगातार फिल्ममा व्यस्त हुने भएपछि विजयले कमेडी टिभी शो 'कमेडी दरबार' छाड्न लागेको चर्चा छ।
यसबारे सेतोपाटीसँग कुरा गर्दै विजयले फिल्ममा व्यस्त हुँदा शोमा समय दिन नभ्याउने देखिएको बताए।
'सबैको मेहनतले शो सुरूदेखि नै राम्रो भयो। यो मेरा लागि पनि एकदमै खुसीको कुरा हो। राम्रो हुँदाहुँदै शो छाड्नुपर्ने थिएन, तर फिल्मतिर व्यस्त हुने भएपछि समय दिन गाह्रो हुन्छ,' उनले भने, 'फिल्मको सुटिङ पनि प्रायः काठमाडौं बाहिर नै हुन्छ। त्यसैले अब शोमा समय दिन भ्याउँदिन् कि भनेर विक्की जी (निर्देशक) लाई भनिसकेको छु।'
विजयका अनुसार उनले २६ एपिसोडसम्मका लागि एग्रिमेन्ट गरेका छन्।
शो अहिलेसम्म २२ एपिसोड प्रसारणमा आएको छ। अब, बाँकी ४ एपिसोडको पनि छायांकन भइसकेको छ।
त्यसपछि फिल्मतिरको व्यस्तताका कारण विजय शो छाड्ने मनस्थितिमा पुगेका हुन्।
