हास्य कलाकार शिव शंकर रिजाल 'जोगिन्दर पानवाला' ले गाईजात्रा विशेष हास्यव्यंग्य प्रस्तुति सार्वजनिक गरेका छन्।
उनले नेताहरूलाई व्यंग्य गर्दै गाईजात्रा कमेडी कोसेली 'मिसन नौटंकी' सार्वजनिक गरेका हुन्।
यसमा उनले देशमा सबैको चासो र चिन्ताको विषय भष्ट्राचार र नेताहरूको गलत क्रियाकलाप उठाएका छन्। उनले पछिल्लो समय जुनै दलको नेताहरूले भन्ने गरेको 'मिसन चौरासी' को बिषयलाई समेत व्यंग्य गरेका छन्।
नेताहरूको क्रियाकलाप र समाजका विकृति विसंगतिमाथि व्यंग्य गर्दै दर्शक तथा स्रोतालाई मनोरञ्जन दिने उद्देश्यले 'मिसन नौटंकी' सार्वजनिक गरेको शिव शंकरले बताए।
विगतका वर्षमा जस्तै यो पटक पनि उनले आफ्नो ‘गाईजात्रे’ कोसेलीमा प्यारोडी समेटेका छन्। उनले हिट फिल्म 'जाजै जात्रा' को गीत 'लाइदेऊ माया पिरिम' मा प्यारोडी बनाएका छन्।
वि.सं. २०६१ देखि नियमित गाईजात्रा कोसेली ल्याउँदै आएका उनको 'मिसन नौटंकी' २२ औं कोसेली हो। गतवर्ष उनले 'लुछाचुडी' ल्याएका थिए।
'मिसन नौटंकी' मा शिवशंकरसहित राधिका हमाल, प्रेम शर्मा पौडेल, साबित्रा लामिछाने 'सबु', धिरेन्द्र सिंह, किरण खनाल, बेदमणी अधिकारी, बलराम धमला ‘ठुले दाइ’, सबिना बिक, भिम परिया, र बालकलाकार पोस्ना श्रेष्ठको अभिनय छ। ‘मिसन नौटंकी’ लेखन, प्रस्तुति र निर्देशन रिजाल आफैले गरेका हुन्।
'सधैं झैँ यो वर्षपनि दर्शकश्रोताले मेरो कोसेलीमा माया दिनुहुन्छ भन्ने विश्वास छ', शिव शंकरले भने।
गाईजात्रा प्रस्तुति मंगलबार बेलुका ओएसआर डिजिटल युट्युबमार्फत सार्वजनिक गरिएको छ।
-1746009348.jpg)
