सुदूरपश्चिम सेवा समाज कतारको आयोजनामा राष्ट्रिय तथा स्थानीय कलाकारको साथमा गौरा पर्वको अवसर हुन लागेको कार्यक्रमको सम्पूर्ण तयारी पूरा भएको छ।
यहि आउँदो अक्टोबर ८ तारिख शुक्रबारका दिन दोहास्थित गल्फ प्याराइजन होटलको सभा हलमा सो कार्यक्रम हुने भएको छ ।
कार्यक्रममा राष्ट्रिय दोहोरी गायिका देविका केसीका साथ नेपालबाट अतिथि कलाकार दोहोरी गायिका अनिता चलाउने, लोक दोहोरी गायक टंक तिमल्सिना जापानबाट लोक दोहोरी गायक दिलेन्द्र जोशीका साथ कतारमा रहेका लोक दोहोरी गायक गङ्गा दत्त गिरी हास्य कलाकार राम बाबु बोहराका साथै सुप सांस्कृतिक परिवारका कलाकारहरू लगायत कतारका विभिन्न संघ संस्थाका कलाकारको प्रस्तुति रहने कार्यक्रम संयोजक प्रेम चलाउनेले जानकारी दिएका छन् । 
के हो गौरा पर्व?पूर्वका फाँटहरूमा गौरा भनेपछि अनौठो लाग्न सक्छ तर नेपाल सरकारले नै मान्यता दिएको एक राष्ट्रिय चाड तथा सुदूरपश्चिमाञ्चलको धार्मिक एवं साँस्कृतिक पर्व हो। यो पर्वको पहिलो दिन बिरुडा पंचमीमा गौरापर्व मनाउने समुदायका महिलाहरूले निराहार रही आ-आफ्नो घरमा तामा वा पित्तलको भाँडोमा बिरुडा अर्थात् पाँचथरीका गेडागुडी भिजाउने गर्छन् ।
गौरापर्वमा व्रतालु तथा श्रद्धालु महिलाहरू गौराघरमा गई शिव र गौरीको पूजाअर्चना गरी बिरुडा नै अक्षता र प्रसादका रूपमा प्रयोग गर्छन्। बिरुडा भिजाएको तेस्रो दिन महिलाहरूले सामूहिक रूपमा धान, साउँ, तिल, अपामार्ग आदि बिरुवाका बोटबाट गौराको प्रतिमूर्ति बनाई गौराघरमा भित्र्याउँछन् ।
विविध धार्मिक अनुष्ठानका साथ गौरालाई गौराघरमा भित्र्याई सकेपछि श्रद्धालु महिलाले शिव र गौरीको पूजाआजा गर्छन् । त्यसपछि विसर्जन नगरिएसम्म गौराघर नजिकको चौरमा पुरुष तथा महिलाहरू छुट्टाछुट्टै रूपमा गोलबद्ध भई स्थानीय लोक भाषामा देउडा, चैत, धमारी आदि खेल खेलेर आनन्द लिन्छन् । अनुकूल तिथि हेरी विसर्जन गरिन्छ ।
मानिसमा धार्मिक आस्था र आपसी सद्भाव बढाउन मद्दत पुर्याउने मात्र नभई यस पर्वमा व्रत बसी शिव र गौरीको पूजाआजा गर्नाले सुखशान्ति प्राप्त हुने तथा ईष्ट कुलदेवता प्रसन्न हुने जनविश्वास छ ।
निख्रिदो झरिसँगै पन्चान्न (पाँच अन्न )को बिरुडा उमारेर गौराको सांस्कृतिक यात्रा सुरू हुन्छ । सामान्यतया भाद्र शुक्ल पक्षमा यो चाड पर्दछ । गौरा एकादशी ( पुत्रदा एकादशी) बाट नै यो पर्वका अनुष्ठान सुरू हुने भए पनि बिरुडा पञ्चमीदेखि भने प्रत्येक घर आँगनमा गौराको रमझम आइसकेको हुन्छ ।
दशैंको जमरा जत्तिकै गौराको बिरुडालाइ पनि सौभाग्यको सूचक मानिन्छ ।
-1746009348.jpg)
