आफ्नो फिल्म हिट होस् भन्ने चाहना जो-कोहीलाई हुन्छ। सफलता पनि कतिबेला मिल्छ पत्तो हुँदैन्। यद्यपि विगतदेखिको माहोल हेर्दा पहिलो फिल्मबाट सफलता पाउने कलाकारहरू थुप्रै छन्।
राजेश हमाल, निखिल उप्रेतीदेखि अनमोल केसीसम्म, रेखा थापा, स्वस्तिमा खड्कादेखि सुहाना थापासम्मका कलाकारहरू पहिलो फिल्मबाट चर्चामा आएका थिए।
वर्षा राउत, आँचल शर्मा, साम्राज्ञी राज्यलक्ष्मी शाह पनि पहिलो फिल्मबाट चर्चामा आएका हुन्।
पछिल्ला वर्ष पनि केही कलाकारहरूले पहिलो फिल्मबाटै चर्चा पाएका छन्।
पहिलो फिल्म हिट भएपछि कोही कलाकारहरू फिल्म क्षेत्रमा निकै व्यस्त छन् भने कोही नयाँ फिल्ममा देखिएका छैनन्।
यहाँ पछिल्ला वर्ष फिल्म क्षेत्रमा उदाएका र पहिलो फिल्मबाटै चर्चा पाएका कलाकारहरूको चर्चा गरिएको छ।
समीर भट्ट
अभिनेता विराज भट्टका छोरा समीरले पहिलो फिल्मबाटै लोभलाग्दो चर्चा कमाए।
आफ्नै बुबाको निर्माण तथा निर्देशनमा समीरले डेब्यु गरेको फिल्म '१२ गाउँ' बक्स अफिसमा सुपरहिट भयो। यो फिल्मबाट समीरलाई एक्सनमा राम्रो सम्भावना बोकेको अभिनेताका रूपमा हेरियो।
'१२ गाउँ' पछि समीर यतिबेला सन्तोष सेनको निर्देशनमा बनिरहेको फिल्म 'बलिदान' को छायांकनमा छन्। अन्य फिल्मबाट पनि समीरलाई अफर आइरहेको छ।
अन्जना बराइली
पछिल्लो समयकी चर्चित अभिनेत्री हुन् अन्जना बराइली।
उनले प्रदीप भट्टराई निर्देशित फिल्म 'महापुरूष' बाट डेब्यु गरेकी थिइन्। पहिलो फिल्म नै सुपरहिट भयो। त्यसपछि उनले अभिनय गरेका 'पुजार सार्की' र 'पूर्णबहादुरको सारंगी' पनि सुपरहिट भयो। अञ्जना हालै फिल्म 'डोरी' मा अनुबन्धित भएकी छन्।
अरूण क्षेत्री
प्रदीप भट्टराई निर्देशित फिल्म 'महापुरूष' बाटै डेब्यु गरेका अभिनेता हुन् अरूण क्षेत्री। उनले पनि पहिलो फिल्मबाट राम्रो चर्चा कमाए। उनलाई राम्रो सम्भावना बोकेको अभिनेताको रूपमा हेरियो।
पहिलो फिल्मबाटै सफलताको स्वाद चाखेका अरूणले 'ज्याकीः आइ एम ट्वान्टी वान' र 'प्रेमा' मा अभिनय गरिसकेका छन्।
प्रकाश सपुत
चर्चित लोकदोहोरी गायक प्रकाश सपुतले फिल्ममा पनि लगातार सफलता पाइरहेका छन्।
उनले नारायण रायमाझी निर्देशित 'परदेशी २' बाट फिल्ममा डेब्यु गरेका थिए। गतवर्ष दसैंमा रिलिज यो फिल्म बक्स अफिसमा हिट भयो।
अहिलेको सुपरहिट फिल्म 'पूर्णबहादुरको सारंगी' प्रकाशको दोस्रो फिल्म हो।
प्रकाशले यतिबेला आफ्नै निर्देशनमा फिल्म 'बसन्त' बनाइरहेका छन्। यो फिल्म चैतमा प्रदर्शनमा आउनेछ। प्रकाशलाई यतिबेला अन्य फिल्मबाट पनि अफर आइरहेको छ।
सनिशा भट्टराई
म्युजिक भिडिओकी चर्चित मोडल सनिशाले विराज भट्ट निर्देशित '१२ गाउँ' बाट फिल्ममा डेब्यु गरिन्।
यो फिल्म बक्स अफिसमा हिट भयो। सनिशा यतिबेला दीवाकर भट्टराईको फिल्म 'नरसिंहा अवतार' मा काम गरिरहेकी छिन्। यसमा उनले अभिनेता राजेश हमालसँग काम गरेकी छिन्।
न्यान्सी खड्का
'१२ गाउँ' बाटै फिल्ममा डेब्यु गरेकी अभिनेत्री हुन् न्यान्सी खड्का। यो फिल्ममा न्यान्सीको अभिनयको पनि तारिफ भएको थियो। न्यान्सी मिस नेपाल इन्टरनेशनल– २०२२ विजेता हुन्।
क्रिस्टिना गुरूङ
सन्तोष सेनको फिल्म 'प्रेमगीत ३' डेब्यु अभिनेत्री हुन् क्रिस्टिना गुरूङ। यो फिल्ममा काम गरिरहँदा क्रिस्टिना निकै चर्चामा थिइन्।
नेपालमा मात्र नभएर भारतमा समेत प्रदर्शनमा आएका कारण फिल्मले राम्रो चर्चा पाएको थियो। फिल्म बक्स अफिसमा हिट सावित भएसँगै क्रिस्टिनाले पहिलो फिल्मबाटै सफलताको स्वाद चाखेकी थिइन्। तर त्यसयता भने उनले अन्य फिल्ममा काम गरेकी छैनन्।
यही वर्ष प्रदर्शनमा आएको फिल्म 'बोक्सीको घर' की कलाकार सुपला सापकोटाले पनि पहिलो फिल्मबाट चर्चा पाइन्।
पहिलो फिल्म नै हिट भएका कलाकारहरूमा अभिनेत्री अश्लेषा सिंह ठकुरी पनि हुन्। उनले 'प्रेम गीत २' बाट फिल्ममा डेब्यु गरिन्। यो फिल्मले राम्रो व्यापार गर्यो भने अश्लेषाको अभिनयको पनि चर्चा भयो। त्यसयता उनले 'मेरी मामु' मा काम गरेकी थिइन्। पछिल्लो समय भने उनले नयाँ फिल्ममा काम गरेकी छैनन्।
अभिनेता धिरज मगर पनि पहिलो फिल्मबाट चर्चामा आएका हुन्। उनको पहिलो फिल्म 'इन्टु मिन्टु लण्डनमा' हिट भएको थियो भने उनको पछिल्लो फिल्म 'खुश्मा' ले पनि बक्स अफिसमा राम्रो व्यापार गरेको थियो।
अभिनेता सलिनमान बानियाँ पनि डेब्यु फिल्मबाट चर्चामा आए। उनको पहिलो फिल्म 'ए मेरो हजुर २' बक्स अफिसमा हिट भयो। त्यसयता यात्रा फिल्ममा काम गरेका उनको नयाँ फिल्म दर्शकले हेर्न पाएका छैनन्।
