गुड फ्राइडे सिनेमा
एउटा टोल छ। यहाँ सधैंजसो छिमेकीहरूबीच गफगाफ चल्छ। अझ ह्वाट्सएप ग्रुपमा रोचक कुराकानी हुन्छन्।
यही समाजकी एक गृहिणी हुन् प्रियादर्शिनी उर्फ प्रिया। गृहिणी जीवनबाट बाहिर निस्किन काम खोजिरहेकी प्रिया श्रीमान एन्थोनी र सानी छोरीका साथ बस्छिन्।
जागिरका लागि बायोडाटा बनाइरहेका बेला एक्कासि कसैले उनको घरबाहिर राखेको गाडीमा ठक्कर दिन्छ। सुरूमा प्रियाले यसलाई खास धेरै चासो दिन्नन्।
टोलमा उनका साथीहरूमध्ये एक हुन् स्टेफी। उनी एकल आमा हुन् जो घर, बच्चा सम्हालिरहेकी हुन्छिन्।
एक दिन उनीहरू दुवै एउटै कम्पनीमा अन्तर्वार्ता दिएर फर्किन्छन्।
त्यतिबेलै टोलमा नयाँ छिमेकी आउँछन्— म्यानुएल र उनकी वृद्ध आमा ग्रेस।
उनीहरू 'ग्रेस बेकर' नामक बेकरी खोल्छन्। म्यानुएल मृदुभाषी र हँसमुख हुन्छन्। सबै छिमेकीसँग मिल्छन्। उनले आमालाई अल्जाइमर भएको सबैलाई बताउँछन्। स्टेफीलाई विशेष स्नेह देखाउँछन्।
प्रियालाई भने किन हो म्यानुएल सहज लाग्दैनन्। उनको घरबाट म्यानुएलको घर सोझै देखिन्छ। त्यसैले उनले म्यानुएलका गतिविधि पनि देखिरहेकी हुन्छिन्।
एक दिन उनले म्यानुएलले ठूलो छेपारो मारेको देख्छिन्। त्यही रात म्यानुएलले छिमेकका सबैलाई बोलाएर पार्टी दिन्छन्। उनले खसीको मासु भन्दै त्यही छेपारोको मासु खुवाइरहेका हुन्छन्।
छेपारो मारेको देखेकी प्रियाले त्यसकै मासु होला भनेर साथीहरूलाई भन्छिन् पनि। अरूले उनको कुरामा खास ध्यान दिँदैनन्।
यसपछि क्रमशः टोलमा असाधारण घटना हुन थाल्छन्। म्यानुएलको व्यवहार पनि शंकास्पद देखिन्छ।
यहीबीच प्रिया र स्टेफी जागिरको अन्तर्वार्ताका लागि छानिन्छन्। उता प्रियाका श्रीमान एन्थोनीको पनि बढुवा हुन्छ र अर्को सहरमा जानुपर्ने हुन्छ। उनीहरूले जानुअगाडि सानो भोज दिन्छन्।
भोजको दिन म्यानुएल जानीजानी घरमा आइरन खुलै राखेर आउँछन्। उनको घरमा आगलागी हुन्छ। पछि उनकी आमा आकस्मिक रूपमा हराउँछिन्। र, केही समयपछि भेटिन्छिन् पनि।
प्रियाको शंका झन् बढ्छ। उनले साथीहरू सुलु र अस्मासँग मिलेर सबै कुरा जोड्ने प्रयास गर्छिन्—मासु घटना, म्यानुएलको असामान्य बानी, स्टेफीप्रतिको उनको झुटो मिठास र सबैभन्दा बढी रहस्यमय आमा ग्रेसको मौनता।
एक दिन ग्रेस फेरि हराउँछिन्। उनकी छोरी डायना पनि विदेशबाट आउँछिन् र केही दिनमै फर्की पनि हाल्छिन्।
यो सबैको चियो प्रियाले गरिरहेकी हुन्छिन्। त्यही क्रममा हराएकी भनिएकी बुढी ग्रेसलाई प्रियाले घरमै देख्छिन्। तर म्यानुएलले आमा नभेटिएको दाबी गर्छन्। प्रियाको कुरा टोलमा पनि कसैले पत्याउँदैन।
त्यसपछि सुरू हुन्छ चुपचाप अन्वेषण। फिल्मको कथा जति अगाडि बढ्छ, प्रिया त्यति नै गहिरो रहस्यमा धसिन्छिन्।
कथाको अन्तिममा जे रहस्य खुल्छ, त्यसको अनुमान कसैलाई हुँदैन। फिल्मका हरेक दृश्यको रहस्यबाट पर्दा खुलेपछि जो कोही अचम्मित हुन्छ।
आखिर के रहस्य हुन्छ म्यानुएलको परिवारको? प्रियाले खोजबिनमा छिर्दाछिर्दै आफूलाई कहाँसम्म पुर्याउँछिन्?
यो सबै जान्न हेर्नुस् मलयालम भाषाको कमेडी मिस्ट्री थ्रिलर फिल्म 'सूक्ष्मदर्शिनी'।
सन् २०२४ मा रिलिज भएको यो फिल्म बक्स अफिसमा पनि सफल भएको थियो।
यसलाई समीक्षकहरूले 'चतुर्याइँपूर्वक बुनिएको थ्रिलर' भन्दै प्रशंसा गरेका छन्।
हास्य र रहस्यको सन्तुलन, बलियो लेखन, गम्भीर सामाजिक सन्देश र दमदार अभिनयले यो फिल्म केबल रहस्यमयी कथा नभएर एक संवेदनशील सामाजिक कथाको रूपमा पनि उभिएको छ।
आज गुड फ्राइडे सिनेमामा हामीले यही फिल्म सिफारिस गरेका छौं जुन हिन्दीमा उपलब्ध छ।
-1753341424.jpeg)
-1746009348.jpg)
