भदौको लागि वाणिज्य बैंकहरूले कर्जामा लिने ब्याजदर औसत १.३७ प्रतिशतले घटेको छ। तर पनि बैंकहरूको कर्जा लगानी भने घटेको छ।
शुक्रबारसम्म आधार दर सार्वजनिक गरेका १२ वाणिज्य बैंकहरूको आधार दर र उनीहरूको अधिकतम प्रिमियम दर हेर्दा कर्जाको औसत ब्याजदर १.३७ प्रतिशतले घटेको हो।
यसअघि साउनमा मुख्य कर्जाहरूमा १४.६० प्रतिशतसम्म ब्याजदर लिइरहेका बैंकहरूले भदौमा १३.२३ प्रतिशतमा सीमित भएको छ।
साउनमा एनएमबी बैंक र कुमारी बैंक दुबैको ब्याजदर सबैभन्दा धेरै १५.३७ प्रतिशत रहेकोमा भदौमा पनि कुमारी बैंकको ब्याजदर नै सबैभन्दा धेरै छ। कुमारी बैंकको १५.३७ प्रतिशत नै छ।
बैंकहरूले आधारदरमा शून्यदेखि ५ प्रतिशतसम्म प्रिमियम थपेर कर्जा दिइरहेका छन्। कृषि विकास बैंक र राष्ट्रिय वाणिज्य बैंकले आधार दरमा लिने प्रिमियमको माथिल्ला दर भने बढाएका छन्।
औसतमा ब्याजदर घटेपनि कर्जा लगानी भने बढ्न सकेको छैन्। बरु घटेको छ। राष्ट्र बैंकको तथ्यांक अनुसार असारमसान्तमा बैंक तथा वित्तीय संस्थाले गरेको कर्जा लगानी भने थप ६ अर्ब रूपैयाँले घटेको छ।
असार मसान्तसम्ममा ४८ खर्ब ७३ अर्ब रूपैयाँ कर्जा लगानी भएकोमा भदौ ६ गतेसम्ममा भने यस्तो लगानी ४८ खर्ब ६७ लाख रूपैयाँमा सीमित भएको छ।
आन्तरिक मागमा शिथिलता आएसँगै बजारमा कर्जा जान सकेको छैन्। मोबाइल, अटो जस्ता क्षेत्रमा माग घटेको छ। निर्माण क्षेत्रमा विगत केही महिनादेखि नै नकारात्मक वृद्धि देखिएको छ। यसले पनि आन्तरिक माग घटिरहेको छ।
बैंकहरूले भदौको लागि निक्षेपको ब्याजदर समेत बढाएपछि कर्जाको ब्याजदर तत्कालै नघट्ने देखेर पनि व्यवसायीहरू लगानीको लागि आकर्षित भएका छैनन्। अहिले नै ब्याजदर उच्च रहेको समयमा बैंकहरूले भदौको लागि बढाएको यो निक्षेप ब्याजदरको असर असोजमा देखिने छ।
भदौको लागि ११ वाणिज्य बैंकले मुद्दती निक्षेप र तीनले साधारण बचतको ब्याजदर बढाएका थिए। यी बैंकले साउनको लागि मुद्दतीमा ८.९९ प्रतिशतदेखि १०.१ प्रतिशतसम्म ब्याजदर तोकेकोमा भदौको लागि भने ९.५१ देखि १०.८९६ प्रतिशतसम्म तोकेका हुन्।
केही समयअघिसम्म बैंकर संघको नेतृत्वमा सहमतिमा ब्याजदर तोक्ने गरेका बैंकहरूले साउनबाट भने यसमा प्रतिस्पर्धा गरेका थिए। तर, ब्याजदर घटाउनु पर्ने समयमा पनि केही बैंकले ब्याजदर बढाएपछि कम ब्याजदर भएका बैंकबाट निक्षेप ती बैंकमा सरेको थियो।
निक्षेप खोसाखोसको अवस्था आएपछि केही बैंकहरूले भदौमा समेत ब्याजदर बढाए। सरकारी बैंकहरूले समेत आफ्नोमा रहेको अर्बौ निक्षेप गुमाउनु परेपछि ब्याज दर बढाएका थिए।
यही कारण भदौमा धेरै बैंकहरूमा बढेको निक्षेप लागतको भार असोजमा तोकिने कर्जाको ब्याजदर तय गर्ने आधार दरमा पर्नेछ। साउनमा भने बैंकहरूले निक्षेपको ब्याजदर केही घटाएकोले भदौमा आधार दर केही घटेको थियो।
बैंकहरूसँग अहिले लगभग ३ खर्ब ५८ अर्ब रूपैयाँ बराबरको कर्जा लागनी योग्य रकम भए पनि कर्जा लगानी बढ्न नसकेको हो। बैंकहरूको कर्जा लगानी क्षमता देखाउने कर्जा निक्षेप अनुपात मात्रै ८३.६१ प्रतिशत छ। बैंकहरूले ९० प्रतिशतसम्म कर्जा लगानी गर्न पाउँछन्।
| भदौको लागि ब्याजदर |
| बैंक | प्रिमियम न्यूनतम | प्रिमियम अधिकतम | आधार दर | न्यूनतम कर्जा ब्याजदर | अधिकतम कर्जा ब्याजदर |
| सानिमा बैंक | | 5 | 10.15 | 10.15 | 15.15 |
| एनएमबी बैंक | | 5 | 10.3 | 10.3 | 15.3 |
| कृषि विकास बैंक | 2 | 3 | 10.22 | 12.22 | 13.22 |
| कुमारी बैंक | 1 | 4.5 | 10.87 | 11.87 | 15.37 |
| सिटिजन्स बैंक | | 4 | 10.66 | 10.66 | 14.66 |
| माछापुच्छ्रे बैंक | | 4 | 10.46 | 10.46 | 14.46 |
| ग्लोबल आइएमइ बैंक | | 5 | 10.07 | 10.07 | 15.07 |
| सिद्धार्थ बैंक | | 4.5 | 9.9 | 9.9 | 14.4 |
| राष्ट्रिय वाणिज्य बैंक | 2.75 | 3.25 | 8.2 | 10.95 | 11.45 |
| नेपाल इनभेष्टमेन्ट मेगा बैंक | | 5 | 9.67 | 9.67 | 14.67 |
| स्ट्याण्डर्ड चार्टर्ड बैंक | 2 | 5 | 8.84 | 10.84 | 13.84 |
| नेपाल बैंक | 1.5 | 5 | 9.7 | 11.2 | 14.7 |
| साउनको लागि ब्याजदर |
| बैंक | प्रिमियम न्यूनतम | प्रिमियम अधिकतम | आधार दर | न्यूनतम कर्जा ब्याजदर | अधिकतम कर्जा ब्याजदर |
| सानिमा बैंक | | 5 | 10.36 | 10.36 | 15.36 |
| एनएमबी बैंक | | 5 | 10.37 | 10.37 | 15.37 |
| कृषि विकास बैंक | 2 | 5 | 10.14 | 12.14 | 15.14 |
| कुमारी बैंक | 1 | 4.5 | 10.87 | 11.87 | 15.37 |
| सिटिजन्स बैंक | | 4 | 10.72 | 10.72 | 14.72 |
| माछापुच्छ्रे बैंक | | 4 | 10.74 | 10.74 | 14.74 |
| ग्लोबल आइएमइ बैंक | | 5 | 10.2 | 10.2 | 15.2 |
| सिद्धार्थ बैंक | | 4.5 | 10.03 | 10.03 | 14.53 |
| राष्ट्रिय वाणिज्य बैंक | 1.5 | 3.5 | 8.01 | 9.51 | 11.51 |
| नेपाल इनभेष्टमेन्ट मेगा बैंक | | 5 | 9.84 | 9.84 | 14.84 |
| स्ट्याण्डर्ड चार्टर्ड बैंक | 2 | 5 | 8.94 | 10.94 | 13.94 |
| नेपाल बैंक | 1.5 | 5 | 9.55 | 11.05 | 14.55 |
