अमेरिकी विमान निर्माता कम्पनी बोइङले ७३७ म्याक्स मोडलको जहाज बनाउन रोक्ने भएको छ।
आउँदो जनवरीबाट उक्त जहाजको उत्पादन अस्थायी रूपमा बन्द गरिने कम्पनीले जनाएको छ।
गत वर्ष बोइङ ७३७ म्याक्स मोडलका दुई जहाज दुर्घटनामा परेका थिए। इन्डोनेसिया र इथियोपियामा भएका दुर्घटनामा ३४६ जनाले ज्यान गुमाएका थिए।
त्यसपछि संसारभरि धेरै एयरलायन्स उक्त मोडलको जहाज उडाउन रोकेका थिए।
जहाज उडाउन रोक लागे पनि कुनै दिन अमेरिकाको संघीय उड्ययन प्राधिकरणले फेरि उक्त जहाज उडान अनुमति दिने बोइङको अपेक्षा थियो। उसले केही अर्डर पनि लिएको थियो। यद्यपी उक्त मोडलको जहाज अर्डर निकै घटेको थियो।
यही डिसेम्बरको अन्तिमसम्ममा ७३७ म्याक्स उडाउने अनुमति मिल्छ होला भन्ने सोचेको बोइङले त्यो पूरा नहुने पक्का भएपछि उत्पादन रोकेको बताएको छ।
गत साता प्राधिकरणका स्टेफन डिक्सनले सन् २०१९भित्र बोइङको ७३७ म्याक्स उडाउन अनुमति दिन नसकिने बताएका थिए।
बोइङ अमेरिकाको प्रमुख निर्यातकर्ता हो। जहाज उत्पादन रोकिए पनि सिटलस्थित कारखानाका कर्मचारीलाई भने नहटाउने बोइङले जनाएको छ। तर बोइङको यो निर्णयले अमेरिकी अर्थतन्त्रमा भने असर पर्ने बताइएको छ।
बोइङले अब बनिसकेका ४०० वटा ७३७ म्याक्सलाई डेलिभर गर्न केन्द्रीत हुने जनाएको छ।
बोइङको ७३७ सिरिजमा म्याक्स पछिल्लो मोडल हो। यसअघिका मोडलभन्दा यो मोडलको जहाज इन्धन खपतमा किफायती थियो। बोइङका ७३७ सिरिजका यसअघिका जहाजहरू सबैभन्दा सुरक्षितमध्ये मानिन्छन्। म्याक्सको ७, ८, ९ र १० मोडलका जहाजले १३८ देखि २०४ जनासम्म यात्रु बोक्न सक्छन्। दुई लहरमात्र सिट भएका यी जहाज छोटो र मध्यम दूरीका लागि उपयुक्त छन्।
इन्डोनेसियाको लायन र इथियोपियन एयरलायन्सका दुर्घटनाग्रस्त दुबै जहाजमा उचाइ लिँदा नै समस्या आएको प्रारम्भिक अनुसन्धानले देखाएको छ।
यसकारण उड्ययन विज्ञहरूले यो जहाजको नियन्त्रण प्रणालीको समस्या भएको हुन सक्ने अनुमान गरेका थिए।
-1746009348.jpg)
