काठमाडौंको तिनकुनेस्थित आइएसएमटी कलेजमा आयोजित 'आइएसएमटी कार्निभल २०२३' सम्पन्न भएको छ।
कलेजका बिजनेश डेभलप्मेन्ट प्रमुख बासुदेव वस्तीका अनुसार सोही कलेजमा अध्ययनरत बिएचएमका विद्यार्थीहरूले उक्त कार्निभल आयोजना गरेका हुन्।
‘बिएचएमको पाठ्यक्रममै इभेन्ट व्यवस्थापनसम्बन्धी अध्ययन मोड्युल छ। त्यस प्रकारको पाठलाई सैद्धान्तिक मात्र नभई व्यावहारिक रूपमा कार्यान्वयन गर्दै सिके राम्रो हुन्छ। पढाई पनि प्रभावकारी हुन्छ। यिनै कुरालाई ध्यानमा राख्दै यस प्रकारको कार्यक्रम आयोजना गर्छौं,’ उनले भने।
उनका अनुसार पाठ्यक्रममा विभिन्न अध्यायहरू छन् जसलाई व्यावहारिक शिक्षण चाहिन्छ। कलेजले कार्निभल २०२३ जस्ता अन्य कार्यक्रमहरू पनि आयोजना गरिरहेको समेत वस्तीले बताए।
इभेन्ट आयोजना गर्दा र स्टल राख्दा विद्यार्थीहरूले समग्र स्रोत व्यवस्थापन, वित्त व्यवस्थापन, मार्केटिङ, समूह व्यवस्थापन लगायत विषयबारे पनि बुझ्ने उनको भनाइ छ।
बिहीबार आयोजित कार्निभल २०२३ मा करिब एक दर्जन फूड र गेम स्टलहरू थिए। त्यस्तै कार्निभलमा मनोरञ्जनका लागि गीत-संगीत र नाचगान कार्यक्रम पनि थियो।
आयोजक विद्यार्थीहरूका अनुसार कलेजले यस प्रकारको कार्यक्रम आयोजना गर्न सहयोग गर्नाले उनीहरूलाई व्यावहारिक सिकाईमा सहजता मिलेको छ। उनीहरूले कार्निभलमा ८ सयदेखि एक हजार आगन्तुकहरू पुग्ने अपेक्षा राखेकोमा सो लक्ष्य पनि पुरा भएको उनीहरूले बताए।
यसमा थप बोल्दै वस्तीले भने, 'कलेज कै विद्यार्थीहरूसँगै अभिभावक, शिक्षक र कलेजका कर्मचारीहरूको पनि उपस्थिति रह्यो। यसबाहेक अन्य कलेजका विद्यार्थीहरूले पनि सहभागिता जनाएका थिए।'
