नेपालले लन्डनमा आयोजना गरिएको ’वर्ल्ड ट्राभल मार्केट २०२४(डब्ल्युटिएम) मा सहभागिता जनाएको छ।
२०८१ कात्तिक २० देखि २२ गते (५–७ नोभेम्बर २०२४) सम्मका लागि तय गरिएको वर्ल्ड ट्राभल मार्केट–२०२४ मा नेपालले साहसिक यात्रा, सांस्कृतिक विविधता, र दिगो पर्यटनका लागि अग्रणी गन्तव्यको रूपमा आफ्नो उपस्थिति जनाउँदै गर्दै विश्व पर्यटन उद्योगको ध्यान आकर्षित गरेको छ।
नेपाल पर्यटन बोर्डले गौरवपूर्वक आफ्नो ४० वर्षको सहभागिता वर्षको उत्सव मनाउँदै, विश्व पर्यटन क्षेत्रमा लामो समयदेखिको योगदानलाई निरन्तरता दिएको हो।
कुल १८४ देशहरूबाट ४३ हजार सहभागी, ३ हजार ८७५ प्रदर्शकहरू सहभागी, डब्ल्युटिएममा ८२ वटा सम्मेलन सत्रहरू आयोजना गरिएको थियो।
हालै लोन्ली प्लानेटद्वारा २०२४ का लागि बेस्ट इन ट्राभल गन्तव्यका रूपमा घोषित भएपछि, यस वर्ष डब्लयुटिएममा नेपालको उपस्थिति थप महत्वपूर्ण बनेको छ।
यसले विश्वभरका यात्रुहरू र पर्यटन व्यवसायीसामु नेपालको अनौठो सम्पदाहरूलाई प्रस्तुत गर्ने महत्त्वपूर्ण अवसर प्रदान गरेको छ।
वर्ल्ड ट्राभल मार्केटमा नेपालको सहभागिताले नेपाललाई उच्च सम्भावनायुक्त बजारसँग प्रत्यक्ष संलग्न हुन सघाउने र यसले नेपाललाई शीर्ष अन्तर्राष्ट्रिय गन्तव्यहरूको साथ उभ्याउने नेपाल बोर्डका कार्यकारी प्रमुख दीपकराज जोशीले बताए।
उनले नेपालको यो सहभागिताले नयाँ व्यवसायिक अवसरहरू विकास गर्ने समेत बताए। साथै समृद्ध संस्कृति, अनुपम प्राकृतिक दृश्य, र पर्यावरणमैत्री पर्यटनमा रूचि राख्ने वातावरणीय सजग यात्रुसँग सम्बन्ध स्थापित गर्ने अनौठो अवसर प्रदान गर्नेछ।
'लोन्ली प्लानेटले नेपाललाई बेस्ट इन ट्राभल गन्तव्यका रूपमा सम्मानित गरेको छ। लोन्ली प्लानेटको यो मान्यताले नेपालको पर्यटन सेवाहरूलाई थप विश्वसनीयता प्रदान गर्दै प्रतिस्पर्धी गन्तव्यहरूबाट यसलाई अलग बनाउँछ,' उनले भने।
डब्ल्युटिएममा नेपालको सहभागिताले देशका अनुपम परिदृश्यहरू प्रख्यात हिमालदेखि प्राचीन सांस्कृतिक स्थलहरूलाई समेटेको छ।
नेपाल विश्वका लागि आकर्षक गन्तव्यका रूपमा रहेको सन्दर्भमा नेपाललाई साहसिक यात्रा, अध्यात्म र सम्पदाको संयोजनको गन्तव्यका रुपमा थप परिचित र बलियो छवि बनाउने कार्यमा यो सहभागिताले महत्त्वपूर्ण भूमिका खेल्ने उनको भनाइ छ।
डब्ल्युटिएमा नेपालबाट विभिन्न ट्राभल कम्पनीहरू होटल, रिसोर्ट लगायतका प्रतिनिधिको सहभागिता थियो।
