नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले माओवादी केन्द्रलाई देशकै सबभन्दा ठूलो पार्टी बनाउने दाबी गरेका छन्।
सोमबार आयोजित पार्टीको केन्द्रीय निर्वाचन समितिको भर्चुअल अभिमूखीकरण बैठकमा बोल्दै प्रचण्डले माओवादी आकारमा सानो भए पनि एजेण्डाका आधारमा देशको सबभन्दा ठूलो पार्टी रहेको दाबी गरेका हुन्।
'विचार आधारित विधि पद्धति आधारित र सबै तहमा निर्वाचित प्रतिनिधि रहेको देशकै सबभन्दा ठूलो पार्टी माओवादी केन्द्र बन्नेछ',उनले भने,'सानो भए पनि एजेण्डाका आधारमा माओवादी अहिले पनि देशको सबभन्दा ठूलो दल हो। संविधानसभा, गणतन्त्र, संघीयताजस्ता परिवर्तनका सबै एजेण्डा हाम्रै हुन् भन्नेमा कोही कसैलाई भ्रम छैन।'
केपी ओलीको प्रतिगमनविरूद्ध संघर्षको नेतृत्व नै माओवादीले गरेको उनले दाबी गरे।
प्रचण्डले विधि र पद्धतिसम्मत रूपमा पार्टी सञ्चालन गरिने बताए।
अबदेखि पार्टीका सबै कमिटीका सदस्यदेखि पदाधिकारीसम्म निर्वाचनमार्फत् चुनिने भन्दै उनले निर्वाचन आयोगको जानकारी र उपस्थितिबिना कुनै पनि कमिटीको निर्वाचन वा सम्मेलन नहुने स्पष्ट गरे।
‘विधिसम्मत निर्वाचन सम्पन्न भएर आयोगले प्रमाणपत्र दिएर प्रमाणित नभएसम्म त्यसले आधिकारिकता पाउने छैन’, उनले भने।
कार्यक्रममा माओवादी केन्द्रीय कार्यालय इञ्चार्ज एवं स्थायी समिति सदस्य वर्षमान पुनले व्यक्तिगत महत्वकांक्षा र स्वार्थका लागि पार्टीभित्र गुटबन्दी नगर्न आग्रह गरे।
पुनले प्रचण्डको वरिपरि गोलबन्द भएर क्रान्तिकारी पार्टी निर्माणमा जुट्न नेता कार्यकर्तालाई अपिल गरे।
'व्यक्तिगत स्वार्थ र महत्वाकांक्षाका लागि गुटबन्दी गर्ने प्रवृत्ति क्रान्तिकारी प्रवृत्ति होइन', उनले भने,'विचार र पार्टी बलियो बनाउने काममा लाग्नुपर्छ, हामी सबै अध्यक्ष प्रचण्डको वरिपरि गोलबद्ध भएमात्र पार्टी बलियो हुन्छ। बलियो पार्टीले मात्र जनताको सेवा गर्न सक्छ।'
क्रान्तिकारी विचारयुक्त विधि र प्रक्रियामार्फत् आन्तरिक संरचना सुदृढ पारेर शहीद तथा बेपत्ता परिवार र विपन्न वर्गको सेवामा समर्पित कम्युनिष्ट पार्टी निर्माणमा लाग्न उनले आग्रह गरे।
'पार्टीलाई विभिन्न गुट र स्वार्थ समूहबाट अलग गरेर विचारले एक, राजनीतिले एक, संगठनले एक क्रान्तिकारी जोश र जाँगरले एकताबाद्ध बनाउन जरूरी छ’, पुनले भने।
उनले नेतृत्व चयनका लागि हुने निर्वाचन प्रक्रियामा सहयोग गर्न सबै कमिटीलाई केन्द्रीय कार्यालयका तर्फबाट निर्देशन दिए।
